LA PAJINA DJUDEO-ESPANYOLA de AKI YERUSHALAYIM
SEFARAD
Asosiasion para la Prezervasion i Difuzion de la Kultura Djudeoespanyola

PAJINA DE ENTRADA

TODOS LOS
NUMEROS DE AKI YERUSHALAYIM

ARTIKOLOS

ARTIKOLO de numero 85 (2009)

LOS CAMONDOS
Saga de la famiya de bankeres djudios del
Imperio Otomano en los siglos 18-19

Zelda Ovadia

El primer Camondo mensionado en la istoria de esta eminente famiya es Haim Camondo, ke en 1782 fue ekspulsado de Estambol sovre el orden del Reis Efendi, el ministro de eksterior de akeya epoka en el Imperio Otomano. Malgrado la intervension de personalidades de alto posto i de diplomatos de paizes ajenos, este orden no pudo ser anulado. Haim Camondo, una de las personas mas rikas i uno de los notables de la komunidad djudia de Estambol, su mujer Sinyuru, su ija Rebeka, su ijo Isaac kon su mujer Anna i sus bebe, duvieron salir del paiz, el 6 de Oktobre 1782, abandonando ayi todos sus bienes. La razon de sus ekspulsion nunka fue aklarada.

Eyos se aresentaron en Trieste ma, kontrariamente a lo ke se podia pensar, tomando en konsiderasion los duros momentos ke pasaron kon sus ekspulsion, en Italia empeso para eyos una epoka de enfloresimiento i prosperidad.

En 1789 el nombre de Isaac Camondo aparese en los rejistros de la Munisipalidad de Trieste komo direktor de la Union de las Kompanias de Aseguransa. Los Camondos ke se ganan una buena fama i son respektados por todos, no olvidaran nunka la ospitalidad de los italianos i en sinyo de agradesimiento, a lo largo de unas kuantas jenerasiones eyos kedaran suditos italianos.

Djuntos kon esto lo bienes de la famiya en Estambol no avian sido konfiskados, fakto muy sovresaliente en la istoria del Imperio. No es klaro si eyos fueron salvados kon la intervension del reprezentante del Papa en Estambol o porke ya se avia kalmado la ravia de Babiali –la Sublima Puerta, el goverrno otomano – tomando en konsiderasion el ayudo ke le avia sido dado por este banker djudio embiado al exilo.

Verso la fin del siglo 18 i en la primera metad del siglo 19 la komunidad djudia de Estambol, ke era entonses una de las mas grandes del mundo, i era kompuesta en su mayoria por los sefaradis, desendientes de los djudios ekspulsados de Espanya en 1492, estava pasando por una seria de dezvelopamientos sosiales, ekonomikos i kulturales.

Entre otras, los djudios ke bivian en los kuartieres de Balat i Hasköy a la oriya del Haliç – el Kuerno de Oro – i los ke bivian en Ortaköy i Kuzkuncuk, en el Bosfor, empesan a aresentarsen en los kuartieres de Galata i Pera. El kuartier de Pera, Beyoglu de muestros dias, era povlado en su mayoria por reprezentantes de paizes ajenos i por una sosiedad mas distingida i aristokrata. Es djustamente en esta epoka ke se empesa a oyir de muevo de la famiya Camondo, aun ke no ay una informasion sovre la data exakta de su retorno a Estambol.

El ijo de Isaac Camondo, Salomon-Yaakov, fondo la banka ke yevava su nombre en Galata, onde bivia kaje la metad de la povlasion djudia de la sivdad. Ma la prinsipal razon de avrir esta banka ayi es el fakto ke este kuartier se topa serka del porto i del sentro komersial de Estambol.

Avraam-Salomon Camondo se kazo el 25 de Mayo 1804 kon la ija de Haim Sabetay Yuda Levi, Klara. A la diferensia del otro famozo banker djudio de akeya epoka, Mayer Amschel Rotschild, ke tenia entonses sinko ijos ke asegurarian el futuro de su famiya, Salomon Yaakov Camondo tuvo un solo ijo, Refael, ke nasio en 1810.

Sea por falta de intereso en el kampo bankario i sea por lo ke el se engrandesio a la solombra de su famozo padre, la istoria mensiona a Refael komo una persona sin briyo. El murio a la edad de 56 anyos, ma desho detras de el dos ijos: Avraam-Behor i Nissim ke fueron los ke yevaron a su kolmo los bienes de la famiya.

Avraam-Salomon i despues sus dos inyetos Avraam-Behor i Nissim fueron los konsejeros privados, los bankeres i los amigos de los pashas Rashid, Ali i Fuad, arkitektos del Tanzimat Devri (la Epoka de Reformas en el Imperio Otomano).

El manadero de las rikezas de Avraam Salomon Camondo no era solamente la banka sino ke los numerozos immobles de los kualos tenia grandes revinidos. Malgrado ke tenia suditansa italiana le fue permetido de merkar terrenos i edifisios. En 1889 los Camondos tenian en Estambol 10 hanes i en Pera i Galata 5 apartamentos privados; terrenos; un teatro - el Alcazar; magazenes en Uskűdar i Galata; fabrikas; terrenos kon plantasiones de arvoles de azetunas i una ferma en Çorlu.

Frente al estado deskayido de la sivdad, los abitantes kosmopolites de Pera izieron presion sovrel governo i obtuvieron rezultados pozitivos. Se formo una “Komision Munisipala para el Bienestar de la Sivdad” ke Avraam Camondo era uno de sus miembros. Las kayes son ancheadas i arelumbradas kon elektrisidad. Los viejos edifisios son derrokados i son fraguados muevos en sus lugar. Diez de los hanes de los Camondos son fraguados en la kaye yamada oy Bankalar Caddesi.

En esta epoka los ermanos Camondo empesaron a bivir una vida de luso i fraguaron kada uno su konak (rezidensia privada) a pokos metros de sus lavoro. Ma eyos no se kontentaron kon esto. Estas kazas, kada una de las kualas tiene 20 kamaretas, fueron dekoradas kon los mas karos mobles i ovras de arte de la epoka.

Para fasilitar sus idas i vinidas a la banka eyos izieron konstruir las famozas eskaleras de Camondo en el estilo Art Nouveau ke era muy de moda en esta epoka i pueden ser vistas asta oy.

Los inyetos Avraam- Behor i Nissim pasan los mezes del enverano en Yeniköy, en el Bosfor. Eyos son una parte de la aristokrasia de la sivdad.

El titolo “Rotschildes del Oriente” dado a los Camondos no fue una simple komparasion entre las dos famiyas sino ke eyas tenian munchos puntos en komun: Eyas no se okupavan solamente de kestiones finansiarias i bankarias sino ke de aktos de bienfezensia tambien, ayudando kon sus donos a sus korelijionarios.

Los Camondos eran miembros en el Komite Sentral de la Alliance Israelite Universelle no solo en Estambol sino ke en Paris tambien. Elevos ke se distingian en sus estudios en la eskola de Hasköy, en Estambol, resivian bolsas para kontinuar a embezarsen en la Aliansa en Paris.

De mizmo ke sus gran papa, Avraam-Salomon, ke se avia aresentado en la kapitala franseza, los dos ermanos Camondo, Avraam-Behor i Nissim, eyos tambien, ya estavan aprontandosen a deshar el Imperio i realizar sus esfuenyo: bivir en la sivdad de las luzes, Paris. Ma entremientres le imperatrisa de Austria, Eugenie, pasa por Estambol en su viaje a Cairo, para partisipar a la aviertura del kanal de Suez, i eya deskoje a la Banka Camondo komo la banka ke le dara servisios finansiarios durante su estadia ayi, i eyos atrazan sus partensia por un sierto tiempo, aprovechando esta okazion para pujar sus fama al seno del governo otomano i en el mundo tambien.

Mas tadre, i grasias a la amistad i las buenas relasiones ke existen entre los dos ermanos, eyos reushen a superar todos los obstakolos en sus kamino a Paris. Avraam-Behor se fragua, en la kaye Monceau 61, un chiko palasio mientres ke su ermano Nissim fragua su rezidensia en la kaye Monceau 63. Eyos resiven el titolo de nobleza de konde i desde entonses son yamados los kondes de Camondo.

Todo en ovrando para enreziar sus estatuto en el mundo bankario en Paris los dos ermanos no se olvidan de sus sivdad natala, Estambol. Eyos se enkargan del transporto publiko de la sivdad i forman la kompaniya yamada Sirket-i Hayriye. En la mar, eyos remplasan kon vaporikos las barkas a ramos ke azien el kamino entre las dos kostas del Bosfor, konektando ansi Asia a Evropa kon una rapidez ke no era konosida en akeyos tiempos. Este muevo medio de transporto ansi ke los tramwayes travados por kavayos trokaron konsiderablamente la vida de los sivdadinos de Estambol.

Los ermanos Avraam-Behor i Nissim saven ke en desparte de los negosios eyos deven integrarsen kompletamente en la vida sosial de Paris i ser una parte de la “haute societe”. Una de las reglas es de arekojer objetos de arte de muy alta valor, merkar pinturas i dekorar sus rezidensias a los estilos gotiko, barok o neoklasiko. Sus rezidensias en Paris devienen puntos de atraksion para la alta sosiedad. Eskritores, pintores, bankeres i politisianos se arekojen ayi para gostar de los mijores platos i bever vinos de los mas karos ke avia.

Avraam-Behor tiene una ija, Clarisse, i un ijo, Isaac. Nissim tiene el tambien una ija, Rebeka, i un ijo, Moise. Los dos ermanos murieron en 1889, a unos 10 mezes de diferensia el uno del otro. Los ijos, Isaac i Moise, kontinuan el kamino de su padres i de sus biznono, Avraam Salomon, ma eyos se aleshan mas i mas de Estambol i de los negosios ayi ke son dirijidos por empiegados de konfiensa.

Isaac no se kazo nunka i no tuvo desendientes. Moise se kazo kon la ija de uan famiya de bankeres, Irene de Cahen. De este kazamiento nasieron Nissim i Beatrice. Sus vida pasa en resepsiones, balos i partidas de kasa en sus rezidensias leshos de la sivdad. Ma esta vida ke parese ser tan oroza se interrompe despues ke Irene se enamora del konde Sampieri, desha a su marido i sus kreaturas i se va kon su namorado. Moise se divorsa el 8 de Enero 1902 i para olvidar su grande pena se dedika al arte i a la muzika ke el tanto ama.

Entremientres desbrocha la I Gerra Mundiala i su ijo Nissim es mobilizado. El eskrive a su padre del fronte i le konta sovre las dezgrasias de la gerra i los momentos difisiles i de espanto ke esta pasando. Ma en segito a una operasion de apandisit el es aleshado del fronte i poko despues toma la desizion de entrar a la fuersa aerea. Desde akel momento sus kondisiones de vida trokan enteramente. El es enkargado kon la mision de tomar fotografias aereas. Ma Nissim ke era un djoven kon grande ambision se embeza a pilotar tambien. El eskrive a su padre kon alegria ke esta logrando alkanses i ke fue elevado al grado de kapitan.

En un komunikado publikado el 5 de Disiembre 1917 fue dicho ke el avion del kapitan Nissim Camondo fue abatido en un kombate kon el enimigo. Su kuerpo fue topado despues de largas semanas ke pasaron entre la esperansa i el dezespero. El fue enterrado por los almanes, en Lorraine, kon una seremonia militara.

Esta muerte es un duro golpe para Moise de Camondo. La alegria de su vida son agora sus dos inyetos Fanny i Bertrand, los ijos de su ija Beatrice ke se kazo kon Leon Reinach. Su okupasion preferada, los artes i las koleksiones de pinturas, es para Moise komo una terapia ke le azen olvidar parsialmente su dolor. El konde Moise de Camondo transforma su rezidensia en la kaye Monceau 61 en un muzeo ke yama al nombre de su padre el konde Nissim de Camondo i de su ijo, el kapitan Nissim de Camondo. El transfera esta rezidensia kon todo su kontenido al governo de Fransia.

Moise de Camondo murio el 15 de Novembre 1935. El Muzeo Nissim de Camondo fue inaugurado un anyo despues de su muerte, el 21 de Disiembre 1936 i el es avierto asta oy dia i puede ser vijitado por el ancho publiko.

Viniendo a Beatrice, eya bive una vida simple i engrandese a sus kreaturas ke ya tienen las edades de 16 i 13 anyos kuando desbrocha la II Gerra Mundiala. Paris es trespizada por las botas de los nazis. Eya se konverte al kristianismo i esta segura ke no sera tokada: su ermano gerreo por la Fransia, kayo en el fronte i despues de su muerte resivio la dekorasion de la Legion d’Honneur. Su padre avia aregalado sus bienes al governo fransez… No tenia por kualo preokuparse! Ma eya se yerro....En el enverano de 1943 eya i su famiya son deportados al kampo de konsentrasion de Drancy.

Entre el 20 de noviembre 1943 i el 4 de Marso 1944, Beatrice, Leon, Fanny i Bertrand son yevados al kampo de eksterminasion de Auschwitz de onde no tornaran mas. Kon sus muerte se termina tambien el ultimo kapitolo de los Camondos, esta famiya ke desho sus trasas en todo lugar onde paso.

Las eskaleras de Camondo, en Estambol, tal ke pueden ser vistas en muestros dias:

Otros artikolos

Tornar