LA PAJINA DJUDEO-ESPANYOLA de AKI YERUSHALAYIM
SEFARAD
Asosiasion para la Prezervasion i Difuzion de la Kultura Djudeoespanyola

PAJINA DE ENTRADA

TODOS LOS
NUMEROS DE AKI YERUSHALAYIM

ARTIKOLOS

ARTIKOLO de numero 85 (2009)

LA KOMUNIDAD SEFARADI DE MADRAS–INDIA
EN LOS SIGLOS 17-18

Mordehay Arbell

El famozo poeta sefaradi de Amsterdam, Daniel Levy de Barios, eskrivio tambien poemas istorikos i jeografikos. Los investigadores son sorprendidos, a vezes, asta ke punto es exakta la informasion en sus poemas ke mos dan un panorama de la vida sefaradi en el siglo 17.

En 1688, por enshemplo, el eskrivio en uno de sus poemas:

Ya en seis ciudades anglas se publica
Luz de seis juntas de Israel sagrada.
Tres en Nieves, London, Jamaica
Quarta y quintana en dos partes de Barbados
Sexta en Madras-Patan se verifica.

Esta era en verdad la situsion en akeya epoka. Uvo una komunidad djudia en Nieves, konosida oy komo la izla de Nevis, en el Mar Caribe. Otra era la de Londra, ke en 1688 era una komunidad relativamente chika. Avia una komunidad sefaradi en la sivdad de Port Royal en Jamaica, i en Barbados avia 2 komunidades – en Bridgetown i en Speightown.

La sejena komunidad basho los inglezes, ke de Barios yama “anglos”, era la de Madras en India, de la kuala se save muy poko. Savemos ke djudios konversos yegaron a Goa, en la India Portugeza, para alesharsen de la Inkizision i profesar mas libremente sus djudaizmo. Solo kuando pujo el numero de estos konversos, St. Francis Xavier demando la instalasion de la Inkizision en Goa. Entre 1561 i 1623 uvo ayi un total de 3800 personas kondanadas por la Inkizision. La mayoria eran djudaizantes, entre eyos, el famozo botanista i farmakologo Dr. Garcia da Orta.

Savemos ainda mas de la India Holandeza. Los olandezos okuparon la rejion de Cochin, en la kosta de Malabar, entre los anyos 1663-1735, periodo en el kual vinieron ayi djudios de Espanya i Portugal para djuntarsen a los ke ya bivian de antes en esta rejion. Los indianos dieron el titolo de “Mudiliar” al shefe de la komunidad ke era siempre de orijin sefaradi. Las mas famozas famiyas de esta komunidad eran las de Halegua i Kastiel.

El primer aresentamiento de los inglezes en India fue el Forte St. George, konstruido en 1639 i al deredor del kual kresio la sivdad de Madras. Djudios sefaradis de Livorno, en Italia, i de la rejion del Caribe empesaron a eksportar korales a India i a importar de ayi diamantes i piedras presiozas ansi ke semi presiozas: rubis, esmeraldas, opales, topazes i mas. Sus aktividad se konsentrava en la kosta de Surat, serka de Madras i en 1683 uno de eyos, Haim (Jacques) de Pavia, de la komunidad sefaradi de Amsterdam, pudo konvenser a ka “Kompania Ingleza de las Indias Orientales”, ke era la patrona de Madras, de permeter la rezidensia de merkaderes djudios en Fort St. Geroge. El merko tambien, en la kolina Peddinapeton, el terreno para un simeterio djudio. Ansi se formo la “Kolonia de los Merkaderes Djudios”, enkavesada por Pedro Pereira, Antonio de Porto, Fernando Mendes Henriquez i Haim de Pavia. Kuando en 1688 se kreo la Munisipalidad de Madras, tres de los 12 miembros del Konsejo Munisipal eran djudios.

De Pavia kayo hazino, en una de sus minas de diamantes, i el murio en 1687. Su bivda se fue a bivir kon el governador inglez de Madras, Elihu Yale, ke anyos despues kreo la famoza universidad amerikana “Yale”.

Al grupo de djudios de Amsterdam se djuntaron sefaradis de Ingletierra. Entre los mas famozos de eyos se puede mensionar a Barthholomew Rodriguez (Jacob de Sequiera, murio en 1692), ke se espesializo en djoyas de amber, i Alvaro de Fonseca (Jacob Yeshurun Alvarez, 1652-1742), ke vino de Nevis a Ingletierra, fue el gabay de la komunidad sefaradi de Londra i en 1690 fue elijido komo prezidente de la komunidad djudia de Madras. Era espesialista en el komersio de tekstiles, madera i diamantes i los transportava a sus destinasion kon sus propias naves.

Estos merkaderes ke viajavan a China, Burma, Bengal i a las Filipinas, dominaron en poko tiempo el komersio de piedras presiozas en toda la Asia i se enrikesieron muncho. Los inglezes les dieron todos los derechos siviles i eyos se integraron muy bien en la sosiedad koloniala ingleza. La komunidad tenia las karakteristikas de los magnates koloniales, kon sus virtudes i sus visios. Del punto de vista djudio, eyos azian sus orasiones solo en las Grandes Fiestas, sin tener sinagoga, i la unika propriedad komunitaria era el simeterio.

Entre las figuras importantes de los djudios de Madras kale mensionar a Avraam Navarro. El empeso komo traduktor de una mision ingleza a China i en 1683 reusho a lograr un akordo kon los chinezos sovre el porto de Amoy i la aviertura del komersio libre entre China i Ingletierra. En 1689 la Kompania Ingleza de Indias Orientales lo nombro komo embasador en la korte del imperador mogul Aurang Seb ke sus fuersas atakavan entonses a la kolonia ingleza. Navarro reusho a firmar un akordo de paz kon el imperador i a empesar en el komersio inglez kon los mogules.

Otro famozo djudio de Madras fue Isaac Sardo Abendana (1662-1709). Eksperto mundial de diamantes, piedras presiozas i djoyas kon sede en Madras, el fue nombrado konsejero del governador inglez Thomas Pitt. En su testamento eskrito en inglez el fikso ke su bivda podria kazarse de muevo solamente en una sivdad onde ayga sinagoga.

En el siglo 18 la aktividad komersiala de los djudios de Madras tomo proporsiones mundiales i eyos empesaron a avrir kazas de komersio en Londra, las mas grandes de las kualas eran la de Salomon Franco, de Livorno-Madras-Londra i la de Samuel de Castro i sus ijos Daniel, David, Joseph i Moses, de Curacao-Madras-Londra.

En el siglo 19 ya no kedaron mas famiyas djudias en Madras. En 1934 el simeterio paso al poder de la munisipalidad i las piedras tombales fueron transferadas al park munisipal onde pueden ser vistas, djuntos kon la inskripsion en ebreo “Bet ‘Hayim”, ke se topava sovre la puerta de entrada.

Otros artikolos

Tornar