LA PAJINA DJUDEO-ESPANYOLA
AKI YERUSHALAYIM
Revista Kulturala Djudeo-espanyola

PAJINA DE ENTRADA

AKI YERUSHALAYIM

ULTIMO NUMERO

TODOS LOS NUMEROS

AKI YERUSHALAYIM #99-100

MORDEHAY ARBELL
1929 - 2016
Eminente Diplomato Israeli i Istoriador de las Komunidades Sefaradis

La muerte de Mordehay Arbell es una grande piedrita para Israel, el mundo djudio i sovre todo la kultura sefaradi, ke el fue uno de sus prinsipales investigadores i defensores.

Arbell se distingio en unos kuantos kampos de aktividad, en kada uno de los kualos logro importantes alkanses:

Komo diplomato el sirvio a Israel kon distinksion, en primero en Estambol onde kumplio las fonksiones de konsul, i despues en Colombia, Korea del Sud ansi ke Panama i Haiti onde fue embasador entre los anyos 1972 – 1975

Komo istoriador el sovresalio por sus investigasiones sovre la istoria i kultura de los sefaradis de Austria, Albania, Kroatia, India, Filipinas i sovre todo de la rejion de los Caribes. El aprovecho los anyos ke fue embasador en Panama i Haiti para investigar personalmente la istoria i kultura de las komunidades sefaradis ke enfloresieron en esta rejion.
El se distingio tambien komo eskritor i konferansiero. En los livros i artikolos ke publiko ansi ke en las konferensias ke dio, el deskrivio entre otras el enfloresimiento de las komunidades djudias de los Caribes, malgrado los esforsos de la Inkizision para eliminar kompletamente la prezensia djudia en esta rejion - lo ke no pudo alkansar.

El riko kavdal de konosimientos ke Arbell arekojo, fruto de los anyos ke dediko a la investigasion de estas komunidades, le permetio de ser un kolaborador muy apresiado de la Emision en Ladino de Kol Israel, de la revista Aki Yerushalayim, i de numerozas institusiones publikas i akademikas komo el Kongreso Djudio Mundial, el Instituto Ben Zvi i la Asosiasion Sefarad para la Prezervasion de la Kultura Sefaradi, de la kuala fue prezidente asta su muerte.

Mordehay Arbell, ke nasio en Bulgaria en 1929, izo su aliya a Israel, djuntos kon su famiya, en el korso de la II Gerra Mundiala i estudio en la Universidad Ebrea de Yerushalayim ansi ke en la Sorbonne de Paris, tenia un konosimiento ensiklopediko de la istoria djudia i sovre todo del mundo sefaradi. El gozo de la apresiasion i admirasion de todos los ke oyeron sus konferensias o meldaron sus livros i artikolos, en los kualos trusho a la konosensia del publiko aspektos muy importantes ma poko konosidos de la istoria i kultura de muestras komunidades.

Ke su alma deskanse en paz.

Tornar