LA PAJINA DJUDEO-ESPANYOLA
AKI YERUSHALAYIM
Revista Kulturala Djudeo-espanyola

PAJINA DE ENTRADA

AKI YERUSHALAYIM

ULTIMO NUMERO

TODOS LOS NUMEROS

AKI YERUSHALAYIM #99-100

JEAN CARASSO
20.6.2016

Jean Carasso, ke su muerte el 20 de Djunio, mos atristo muncho, fue una persona ke tuvo una influensa i una kontribusion inapresiable a los esforsos para mantener i promover el ladino i su kultura.

“La Lettre Sepharade”, la revista ke el fondo i fue su shefe redaktor durante anyos, en los kualos yego a una tirada de serka de 5000 exemplares meldados en serka de 50 paizes en diversas partes del mundo; la reushidad del Kolokio sovre el Futuro del Ladino ke organizo en Paris, en kolaborasion kon la ANL i basho los auspisios de la UNESCO; su inisiativa de reeditar livros en ladino ke ya no podian mas ser alkansados; la Fiesta de Djoha – ke permete a sienes de sefaradis de Paris i sus entornos, de reunirsen una vez al anyo i alegrarsen djuntos kon komidas, kuentos i kantes sefaradis; i enfin la kreasion de la asosiasion “Aki Estamos” ke esta kontinuando su ovra – son alkanses de grande importansia, devidos a su inisiativa, ke ayudaron muncho al renovamiento i intensifikasion de la aktividad para la prezervasion i promosion del ladino i su kultura al seno de los sefaradis de Fransia, i de otros paizes mas.

Jean Carasso se distingio tambien por la jenerozidad kon la kuala apoyo i ayudo a numerozos proyektos en este kampo - de personas individuales ansi komo de asosiasiones ke publikan revistas en ladino, komo Aki Yerushalayim, El Amaneser i mas.

Kon su karizma, su enerjia, dinamizmo i esprito de optimizmo ke lo karakterizavan, el fue de entre los ke mas ayudaron al enfloresimiento de la aktividad kulturala djudeoespanyola al seno de los sefaradis de Fransia i munchos otos paizes tambien.

Ke su alma deskanse en paz, kon la konvinksion ke su ovra es kontinuada por los ke el formo i se inspiraron de su exemplo.

Tornar