LA PAJINA DJUDEO-ESPANYOLA
AKI YERUSHALAYIM
Revista Kulturala Djudeo-espanyola

PAJINA DE ENTRADA

AKI YERUSHALAYIM

ULTIMO NUMERO

TODOS LOS NUMEROS

AKI YERUSHALAYIM #99-100

PANORAMA MUNDIAL DE LAS AKTIVIDADES
PARA EL MANTENIMIENTO I DIFUZION
DEL LADINO I SU KULTURA

ISRAEL

Israel es sin duda el paiz onde se nota la mas grande aktividad en el kampo de la kultura djudeoespanyola, i esto es natural por 2 kavzas prinsipalmente: En primer lugar, porke en Israel bive el mas grande numero de sefaradis ke, eyos o sus djenitores, nasieron en uno de los paizes ke eran parte del Imperio Otomano i onde nasio el ladino, komo lengua de komunikasion entre los ekspulsados de Espanya ke se aresentaron ayi.

Sigunda – Israel es tambien el solo paiz ke sus institusiones nasionales rekonosieron al ladino komo una lengua ke, todo en siendo espanyola por sus karakteristikas linguistikas, por su kontenido i por el esprito ke empapa a su folklor i su literatura, es una kreasion djudia, ke devemos konservar i no permeter ke sea ulvidada; i es kon esta intension djustamente ke, en vigor de una ley adoptada por la Keneset, en 1997 fue kreada la Autoridad Nasionala del Ladino.

En los 19 anyos ke pasaron desde entonses la ANL organizo eya mizma i partisipo en kongresos i kolokios ansi ke kursos i dias de estudio sovre el ladino i su kultura, ayudo a krear mas de 15 sirkolos de ladino en las diversas partes del paiz, ayudo a las universidades del paiz a inkluir el ladino en sus programas de estudio i apoyo munchas inisiativas mas en este kampo.

De entre sus aktividades oganyo, mos limitaremos a mensionar dos solo ke sovresalen por sus importansia.

En el kuadro del Festival de Ladino “Adio Kerida” del teatro Habima, en Tel Aviv, la ANL organizo este mez de Enero un konserto de kantes en ladino, en memoria de su primer prezidente, Yitskak Navon k.e.p.d. Tomaron la palavra, entre otros, la Sra Miri Navon Shafir i la prezidente de la ANL, Prof. Tamar Alexander, despues de lo kualo fue prezentado un riko programa de kantes en ladino por Galit Ghiat, Gay i Roi Zu-Arets, Yasmin Levi, Nitsa i Avi Termin, Hani Nahmias i su padre Yaakov Nahmias ansi ke Irit Anavi i su ija Shani Shauli.

El festival “Adio Kerida” inkluyo tambien un reprezentasion del Bustan Sefaradi, un konserto de Kobi Zarko i la ovra de teatro Golgota de Shmuel Refael. El sigundo importante enkontro kultural organizado por la ANL fue el Treser Dia Internasional del Ladino, ke tuvo lugar el 14 de Avril en el Auditorio Steinberg en Holon.

Tomaron la palavra la Prof. Tamar Alexander i Erez Navon (ijo del Primer Prezidente de la ANL Yitsak Navon k.e.p.d.), y despues de eyos el Prof. Shmuel Refael i la aktrisa i kantadera Hani Nahmias prezentaron un muy interesante proyekto: una aplikasion de internet para embezar el ladino a los ninyos, ke kuando sera kompletado permetera a muestras muevas jenerasiones de embezar esta lengua fasilmente, mizmo si eya ya no es mas avlada al seno de su famiya. El programa artistiko inkluyo una komedia ansi ke kantes en ladino, ma la sorpreza de la tadrada fueron los kantes en ladino kantados por el koro de ninyos “Los Kanarios de Yerushalayim” ke se meresio los aplauzos entuziastos de la asistensia.

En el kampo de las aktividades en ladino i sovre la kultura del ladino al seno del publiko, kale mensionar naturalmente la kontinuasion de aktividad de los mas de 15 sirkolos ke fonksionan en las diversas partes del paiz, de Haifa i asta Beer Sheva, ansi ke el sin fin de konsertos, konferensias, kursos i otras aktividades mas - un testimonio de la mizura en la kuala el ladino i su kultura son temas ke interesan mas i mas al publiko en Israel - sefaradi i mizmo non sefaradi.

No menos impresionante es el progreso ke es echo en el kampo akademiko, kon el Sentro Naime i Yeoshua Salti ansi ke el Sentro Gaon, i las 3 grandes universidades del paiz: la Universidad Ebrea de Yerushalayim, la Universidad Ben Gurion de Beer Sheva i la Universidad Bar Ilan, en Ranat Gan. El Departamento de Ladino en esta ultima universidad, ke sus gastes son kuviertos por el Sentro Naime i Yeoshua Salti, ya se gano una tala apresiasion por el numero de sus estudiantes i doktorantes, ansi ke por la variedad de sus kursos ke tokan a importantes aspektos de muestra erensia kulturala, ke la direksion de la Universidad desidio de elevar su grado akademiko i krear, en su lugar un Instituto Internasional sovre Estudios i Investigasiones del Ladino.

Otra institusion ke es muy aktiva en este kampo es el Instituto Maale Adumim, ke esta aziendo un importante lavoro en el kampo de la dijitasion del diksionario ladino-ebreo ansi ke de las koleksiones de kantes, koplas, refranes i kuentos populares ke tiene en sus archivos, proyektos ke estan rendiendo aksesibles al ancho publiko una gran parte de muestra kreasion linguistika, literaria i folklorika.

Otro importante alkanse ke refekta la apresiasion de la kuala goza Israel en lo ke toka a la aktividad atada al ladino i su kultura, es la desizion de la Real Akademia Espanyola, de nombrar komo miembros korespondientes 10 personalidades ke se distingieron por sus alkanses en est e kampo – i de entre las kualas 8 son de Israel (ver a este sujeto el artikolo en paj.11).

TURKIA

Estambol
Silvyo Ovadya
Prezidente, Sentro
Sefaradi de Estambol

La prinsipal aktividad kulturala en ladino, en esta sivdad, es echa en el kuadro del Sentro Sefaradi de Estambol, sovrel kual ya mos fue kontado anchamente por su direktora, Karen Gershon Şarhon’. Sovre lo ke es echo afuera del sentro tambien, mos eskrive aki el Sr.Silvio Ovadia.

Komo un sefaradi turko ke eskrive dainda en djudeoespanyol kada semana i mizmo mas (kon El Amaneser i otros artikolos), i komo el prezidente del Sentro Sefaradi d’Estanbol, kero partajar siertas ideas sovre la situasyon de oy i el futuro de esta lingua i kultura en Turkiya.

Karen Sarhon vos konto en su artikolo sovre lo ke azemos en Estanbol. Vos avlo del Sentro de Investigasiones, de El Amaneser, del Ladino Database, de los romansikos, de los livros de kuentos (partikularmente de Matilda Koen-Sarano) i de los CDs ke estamos publikando.

Realmente estos lavoros van a deshar muncho material a las jenerasyones sigientes. Ma la koza la mas emportante es de saver si los chikos estan entendiendo muestra lingua. Izzet Bana esta aziendo munchos esforsos, kon las "Estreyikas d’Estanbol", para ke las kriaturas kanten en djudeoespanyol. No kreo ke reushimos bastante en este kampo. La nasyonalidad Espanyola es una okazyon porke los ke keren resivirla en vigor de la ley ke fue aprobada ultimamente en Espanya, deven de konoser (entender i avlar) la lingua espanyola i el djudeoespanyol tambien. Kon el Instituto Cervantes puedemos organizar kursos para ambezar el djudeospanyol a los mansevos i a los ke no konosen esta lingua.

Es muy enteresante ke en Estanbol en la Büyükada esto oyendo personas de mi edad (sesenta anyos) ke estan avlando entre eyos el djudezmo i kreo ke estas personas no avlavan esta lingua en sus manseves. Puedeser ke muestra lingua es komo "ir al kal". Kuando vos vash a la sinagoga la muchedumbre no es manseva i vos parese ke en diez anyos no va kedar dingunos. Ma no es este modo. Ay personas ke empesan a vinir al kal despues de una sierta edad i ay sinkuenta anyos ke eyos son la majorita.

Un profesor de la universitad de Kadir Has esta planifikando un projekto sovre "Balat i su Kultura – pasado i trasas de su pasado" ke reelmente mos enteresa i la Komunidad Djudia ansi ke el Sentro Sefaradi d’Estanbol toman parte en este projekto. Devemos azer entrevistas orales kon los djudios dalkavo ke bivieron en Balat porke en poko tiempo va ser muy difisil de topar los Balatlis.

Ya savesh ke para propajar una kultura reelmente kale finansar i tambien tener un apoyo entelektual i akademiko. El apoyo akademiko es muy importante ma malorozamente en Turkiya no es fasil de resivir este apoyo de una universidad porke no son enteresados en la Kultura Sefaradi. Por esta razon asperamos este apoyo de una universita israelyana o de un fondo (israelyano, evropeo o amerikano) ke se enteresa sovre muestra kultura.

Ya puedesh demandar deke la Komunidad Djudia no vos ayuda? Para dizir la vedra mos ayuda kon su posibilidad. Kale saver ke la situasyon ekonomika no permete de gastar muncho por la kultura. La eskola, los menesterozos, los mansevos son kozas ke se ven i son preferados por la djente ke keren ayudar. La grande partida de las personas no pensan ke es tan importante de azer entrevistas kon los Balatlis.

Un otro problem es ke la manseves no esta pujando. Kon mas poka djente es natural ke ay menos aktividades atadas a muestras tradisiones. Djuntos kon esto, las mansevas dainda reushen a gizar komidas sefaradis en las fiestas djudias, las borekas se komen en los limudes, en los fiksos (dias de enkontro semanales entre grupos de amigas), en los aniversaryos de nasimiyento de las kriaturas. En kaza tambien se giza kada dia komidas sefaradis. Mi ijo ke tiene kinze anyos le plaze una grande partida de las komidas ke son gizadas por mi esfuegra, mi ermana o mi mujer.

Ay grupos de mujeres ke publikaron livros sovre las komidas sefaradis i de fiestas djudias (sefaradis) en Estanbol i en İzmir. Se puede oyer kantikas sefaradis no solo en muestras kazas ansi ke en fiestas i konsertos para miembros de la komunidad, sino ke tambien en lokales ke no tienen dingun dar i aver kon los djudios.

Mizmo si vamos a tener siertos problemes kon muestra lingua, no kreo ke vamos a bivir las mismas difikultades kon muestra identidad relijioza i kultural. En estos vente anyos dalkavo la Komunidad Djudia d’Estanbol se izo mas relijioza de lo ke era. Los mansevos son mas serka de la ley, se van mas muncho al kal i kon esto son ovligados de segir las tradisyones sefaradis.

Izmir
Selim Amado (*)

Solo menos de sien anyos antes, bivian en Izmir 25000 Djudios. Kon un pasado de serka 500 anyos, existio ayi una komunidad kon su istoria, sus savios, su folklor, sus institusiones – komo eskolas, sinagogas, yeshivot, ospital, semeteryos, sosiedades de bienfezensia, etc. No solo esto, los djudios de Izmir fueron un elemento importante en el dezvelopamiento del puerto de esta sivdad i en la eksportasion de produktos agrikolos tradisyonales de la rejyon Egea de Anatolia : algodon, tabako, fruta seka, alzeyte oliva, i otros.

Oy en Izmir bive una komunidad djudia de solo 1200-1300 personas. Kere dizir ke de 100 djudios ke bivian en los anyos 1920 en Izmir, kedaron solamente 5. Esto malgrado ke vinieron i se adjuntaron los djudios de las komunidades mas chikas al deredor la sivdad (komo Tire, Milas, Aydin, Manisa, Turgutlu, Salihli etc.) Estos 1200-1300 djudios estan luchando para mantener las institusiones ke sin eyas no se puede mantener una komunidad djudia: sinagogas, semeterio, menesteres relijiozos komo rabino, karne kasher, i kursos elementarios para dar las bazas de edukasion djudia, visto ke las eskolas djudias tuvieron ke ser serradas.

La minimizasion numerika importante de la komunidad trusho kon eya problemas ke no siempre se pueden solusionar. 60 % de los djudios de Izmir son aedados de mas de 60 anyos. Kere dizir ke la komunidad se esta aziendo komunidad de viejos. Las kondisyones de vida son talas ke el djoven ke termina sus estudios segundarios prefera estudiar la Universidad, jeneralmente en Estanbol, i no abolta mas: se instala ayi, o topa su kompanyera de vida djudia en Estanbol; los parientes kedan en Izmir.

El apokamiento de manseves djudia, djuntos kon el manko de motivasion djudia azen ke el numero de kazamientos mikstos kon musulmanos se izo koza koriente ke va indo i pujando; koza ke era un eskandalo una-dos jenerasiones antes en Izmir.

Ay en Izmir medikos, dentistas, akademikos, industrialistas, artistas, eksportadores i komersantes, ansi ke djente ke lavoran kon salario. Jeneralmente sus situasion ekonomika es satisfaziente. No existen mas profesiones artizanalas. Raros son los menesterozos ke biven de la subsidia komunala. La mujer lavora para poder alkansar a un nivel de vida mejor.

Las personas mas aedadas son los ke mas observan los uzos i kostumbres djudios de esta komunidad sefaradi istorika. La frekuentasion de las sinagogas esta muy limitada. El djudeoespanyol (ladino) es avlado por los aedados. Los djovenes no siempre entienden la lingua ke fue la lingua madre de los djudios de Izmir asta 2 jenerasiones antes.

El Ospital Djudio no podia funksionar sin piedritas materialas grandes, dunke tuvo ke ser alkilado. El Asilio de personas aedadas ke era adjasente al edifisyo del ospital tuvo ke ser serrado, i los 15-20 aedados ke bivian ayi fueron instalados sea en un azilio turko afuera de Izmir, o en un apartamento en la sivdad kon personal apropriado i los benevolentes de la komunidad Bet Israel es la sinagoga prinsipal de Izmir, una de las mas ermozas del mundo. En los mezes de enverano esta serrada, i muy raramente tienen lugar ayi bodas i seremonias. La Sinagoga de Alsancak, Shaar Hashamayim, ke fue konstruida en los anyos 1950, onde ay orasiones todos los dias de la semana i anyo entero, tiene ke ser derrokada (por razones teknikas) para fraguar en el mizmo lugar un edifisio ke servira de Sentro Djudio, kon sinagoga, salas de reuniones komunitarias, los buros de la administrasion, klub de jovenes (Liga) i Sunday School para la edukasion de los chikos. Esta desizion kontroversala fue tomada despues de votos del publiko. Agora fue transferida provizoriamente a un lugar serka.

Las sinagogas de los djudios de Izmir son de valor istorika, relijioza, arshitekturala i sosiala. Siertas de eyas estan en muy mal estado i algunas fueron restoradas i mezmo son aktivas siertos dias, komo las sinagogas Algazi, La Senyora, Bikur Holim, Aydinlis, Shalom i Rosh Haar.

La komunidad djudia de Izmir, en kolaborasion kon el Fondo Kiryati projetan la restorasion de 4 sinagogas adjasentes i la kreasion de un komplekso kultural djudio i turistiko ke sera en favor del turizmo de la sivdad de Izmir.

La sinagoga Portugez, inaktiva i kuaje derokada aze munchos anyos, esta en kamino de ser restorada, ansi ke el kortijo de Tsevi: Filantropos de orijen Sabetaista finansan estas retorasiones visto ke el falso mashiah Sabetay Tsvi nasio en esta kaza i fue darshan en el Kal Portugez. La munisipalidad de Izmir restoro el kal de Bet ‘Hillel, ke era la kaza i la sinagoga del Rav Palachi.

Aze munchos anyos ke la komunidad djudia tenia menester de un rabino, para dar al djudio de Izmir las bazas de la konosensia de la ley djudia. Agora esta funksion esta konfiada al Rav Berti deRofe, kon la esperansa ke reushira a aserkar a munchos ke se alesharon de la vida komunitaria.

Funksionan en Izmir un klub de jovenes “La Liga” ansi ke una Lodja de Bnei Brit; fueron formados grupos de preparasion al Bar/Bat Mitzva i el “Sunday School” para los chikos funksiona en los mezes de invierno. Purim i “La Hamera” son, desde unos kuantos anyos, dos okaziones onde kuaje todos los miembros de la komunidad se enkontran i fiestan segun las tradisyones.

En Izmir ay un kasap kasher, i artikolos “kasher” vienen de Istanbul para los ke son mas observantes. El Semeteryo de Altindag esta basho el kontrol de la “Hevra Kadisha” i es mantenido, sovretodo en la mueva parte, de una manera perfekta.

Komo siempre uvo, i agora tanbien se ven miembros de la komunidad ke kedan leshos de toda aktividad. Komo si no abastan los problemas de ser una ckika komunidad, la proporsion de djente ke se estan aziendo mas viejos i el amenguamiento de los djovenes, la asimilasyon i la indiferensia es lo ke azen el mas grande danyo.

Aze 7 anyos, kon los esfuerzos de Rafael Algranati, se publiko en Izmir la revista Internet bi-mensuala DIYALOG. Kon su estilo perfekto, en linguas avladas por los djudios de Izmir, kon la partispasion de eskritores jeneralmente Izmirlis bivyendo en diversas sivdades del mundo, kon informasion bien dokumentada de la vida de los djudios en Izmir oy i en el pasado, DIYALOG fue la boz i la imajen de esta komunidad, ke malgrado ke esta tan chika kontinua a dizir “aki estamos!!!”

Malorozamente, la indiferensia de siertos kolaboradores izyeron ke Rafael tome la desizion de kortar esta publikasion. Agora vienen las buenas novedades ke DIYALOG ve kontinuar a ser publikado.

Ay komunidades djudias mas chikas en el mundo. Sus kontinuasion depende de sus union i sus rezistensia a la asimilasion. Se espera ke Izmir mantiendra siempre su lugar respektavle en la istoria djudia.

_______________

(*) Grasias a Izak Strugo, desde munchos anyos aktivo en la komunidad djudia de Izmir, ke mos dio informasiones sovre el estado de esta komunidad en el 2016).

 

ESPANYA

Aun ke la komunidad djudia de Espanya es relativamente chika, en este paiz djustamente ay una grande aktividad en lo ke toka la kultura djudeoespanyola, no tanto de parte de la komunidad djudia sino ke por institusiones governamentales i kulturalas.

Esto puede ser entendido siendo ke desde la fin del siglo 19, a lo largo de todo el siglo 20 i ainda mas desde prinsipios del siglo 21, Espanya esta investigando i deskuvriendo de muevo la kontribusion de los djudios a su istoria i kultura, i tambien la importansia del mundo sefaradi, ke mantuvo durante 5 siglos i mas la lengua i las tradisiones kulturales ke los ekspulsados yevaron kon si en 1492.

Las institusiones mas veteranas por sus aktividad en este kampo son el CSIC (Consejo Superior de Investigaciones Cientificas), onde los investigadores de lo ke fue de antes el Instituto Arias Montano lavoran agora en el kuadro del departamento de Filolojia Espanyola; la Universidad de Granada, ke tiene un departamento de Estudios ebreos i semitikos, ansi ke las Universidades del Pais Basko, de La Mancha i de Murcia, el Instituto Nahmanides en Gerona i otros mas, ke organizaron en el pasado i organizan ainda kursos i seminarios ansi ke estudios i investigasiones sovre los diversos aspektos de la kultura sefaradi.

El exemplo mas resiente del intereso de las institusiones kulturales i akademikas de Espanya enverso la kultura sefaradi es la desizion de la Real Academia de Espanya de adjustar komo “Miembros korespondientes en el extranjero” 10 investigadores i ekspertos del ladino i su kultura, rekonosiendo kon esto al ladino komo parte de la famiya de lenguas espanyolas, una lengua i su kultura ke deven ser konservadas i transmetidas komo parte integral del patrimonio kultural espanyol. (Ver a este sujeto artikolo en paj 11)

A estas institusiones kale adjustar organizmos komo “Caminos de Sefarad” ke en el kuadro de su aktividad para azer konoser las juderias onde bivieron djudios antes de la ekspulsion, organiza tambien aktividades atadas al folklor i a la gastronomia sefaradi, al haketia, etc. Komo exemplo podemos sitar a la sivdad de Lucena, onde uvo en el pasado una importante komunidad djudia, i ke, segun una informasion ke mos yego ultimamente, en desparte de su proyekto edukativo “Benjamin de Sefarad”, pensa restorar la kaza onde estuvo de antes la antigua Eskola Talmudika, i tambien ayudar a la difuzion de la gastronomia sefaradi en organizando toda una seria de aktividades atadas a este tema.

En las otras sivdades tambien de esta organizasion, i prinsipalmente en sivdades ke tienen un riko pasado istoriko djudio, los programas para atraer turistas, azerles vijitar las sinagogas ke ainda existen, las kayes de las juderias ke en siertos kavzos estan ainda tal i kual komo kuando salieron de ayi los djudios ekspulsados, son una buena okazion para ke estos turistas, i kon eyos munchos espanyoles tambien, konoskan i apresien el rolo ke djugaron los djudios en la istoria i la kreasion kulturala espanyola.

Otro faktor ke sovresale por su aktividad en este kampo es el Centro Sefarad Israel ke empeso anyos atras en el Proyekto Erensia kon el buto de dezvelopar una kolaborasion entre las komunidades sefaradis en las diversas partes del mundo, afin ke ovren endjuntos para mantener sus erensia kultural.

Es interesante ke este afan para deskuvrir i mijor konoser el pasado djudio de Espanya se esta notando a nivel munisipal tambien, i ke munchas sivdades estan kreando institutos, fundasiones i otros organizmos mas para investigar este pasado i la ekstraordinaria kolaborasion ke uvo, siglos atras, entre las 3 grandes kulturas ke koexistieron ayi.

Por mensionar una parte solo de entre estas institusiones podemos sitar al Centro Bonastruc Ca Porta de Gerona, al Espacio Aragon de Zaragoza, al Muzeo David Elul en Bejar, al festival de las Tres Culturas en Cordova, la Universidad de Murcia ke tuvo, oganyo tambien, un enkontro muy reushido en el kuadro del Dia Internasional del Ladino, i mas.

No kale olvidar tambien el sin fin de kantadores i grupos muzikales ke inkluyen en sus repertorio kantes del folklor muzikal sefaradi. Podemos mensionar, de entre los primeros ke kultivaron este kampo a Sofia Noel i Joaquin Diaz, despues de los kualos vinieron Angel Carril, Monica Monasterio, el grupo Arvoleras, Paco Diez, Mara Aranda i munchos mas.

El intereso enverso temas de la erensia sefaradi se nota en el kampo periodistiko tambien: ”Sefarad” del CSIC, i “Raices”, en el kampo de las publikasiones periodikas i, en el kampo de los programas de radio, “Radio Sefarad”, de la Komunidad Djudia de Madrid i la ”Emision Sefardi” de Radio Exterior de España, dirijida i prezentada por Matilde Barnatan i su ija Rahel.

Adjustando a esto los sienes de artikolos en la prensa, de programas en las grandes kadenas de radio i televizion, los sitios de internet i las diezenas de livros sovre temas de la erensia sefaradi publikados por kazas de edision komo El Almendro, Riopiedras, Tirocinio, Certeza i mas… keda klaro ke Espanya es el paiz, afuera de Israel, onde ay mas aktividad para la investigasion i difuzion de la kultura djudeoespanyola.

FRANSIA

El faktor mas aktivo en Fransia, en el kampo de la kultura djudeoespanyola, es aktualmente la asosiasion Aki Estamos. Fondada en 1998, por inisiativa del fondador i shefe redaktor de La Lettre Sepharade, Jean Carasso k.e.p.d., esta asosiasion esta aziendo grandes esforsos para mantener biva la kultura djudeoespanyola al seno de los sefaradis de Fransia.

A este efekto, eya empeso i esta kontinuando en la publikasion de la revista trimestrala “Kaminando i avlando”’. La asosiasion organiza kursos de djudezmo kon la profesora Marie-Christine Varol, atelies de gizado sefaradi, konferensias, konsertos, fiestas para los chikos en Purim i Hanuka, un Seder de Pesah i otros enkontros kulturales. La asosasion tiene tambien un koro djudeoespanyol dirijido por la kantante Marlene Samoun i un atelie de teatro en ladino i en franses.

Una grande reushidad fue la inisiativa de organizar kada dos anyos una “Universidad d’enverano” ke su programa inkluye konferensias, mezas redondas, atelies sovre los diversos aspektos del folklor sefaradi komo kantes i kuentos en ladino ansi ke el gizado sefaradi, i tambien konsertos por algunos de los mijores interpretas de muestros kantes.

Otra aktividad es la “Fiesta de Djoha”, ke fue selebrada por primera vez en 1998, sovre la inisiativa de Jean Carasso, en la sala del teatro L’Epee de Bois, en la Cartoucherie de Vincennes, dando a los amantes del folklor sefaradi la posibilidad de pasar unas kuantas oras de alegria, oyendo kantes en ladino i degustando las burekas i otras spesialidades de muestra gastronomia. En el enkontro de oganyo, el 4 de Septembre, fue echo omaje a la figura de Jean Carasso, k.e.p.d. ke murio pokos mezes atras, el 18 de Djunio (ver a este sujeto muestro artikolo en paj. 6)

Otra aktividad, del kampo de la istoria i kultura de los sefaradis, organizada en kolaborasion entre la asosiasion “Muestros Desparesidos” i la Munisipalidad del 11en Arrondissement de Paris, es el enkontro ke tendra lugar el 6 de Novembre i en el kual sera prezentado el livro “Memorial de la Deportation des Judeoespagnols de France”. Tambien kale mensionar a la asosiasion Vidas Largas, fondada por el Prof. Haim Vidal Sephiha, ke sus aktividades se konsentran en los atelies de djudeoespanyol ansi ke en el programa de radio semanal prezentado por Edmond Cohen, Este programa puede ser oido en las ondas de la radio djudia i sus tekstos pueden ser meldados en el sitio de internet de Ladinokomunita: (https://groups.yahoo.com/neo/groups/Ladinokomunita/files).

ESTADOS UNIDOS DE AMERIKA
Rachel Amado Bortnick

Sefaradis, aunke sean uno o dos de eyos en kada lugar, se topan por kada lado del grande teritorio de los Estados Unidos i , komo verash aki, inisiativas en favor de la lingua i kultura sefaradi no salen solo de organizasiones o institusiones grandes, ma tambien de individuos, ke lo azen kon o sin apoyo de otros.

LOS ANGELES , CALIFORNIA
ucLADINO - Universidad de California, Los Angeles

Kreygo ke ucLADINO es una organizasion unika en el mundo de djudeo-espanyol, porke es kreasion de elevos universitarios spesifikamente para promover el uzo i la saviduria del djudeo-espanyol en la universidad, i es dirijido solo por elevos, todo en teniendo el apoyo finansial i moral de sus universidad, ke es la Universidad de California en Los Angeles. Se fondo en 2011 kon la inisiativa prinsipalmente de Bryan Kirschen, un estudiante de linguistika espanyola, ke agora, kon su grado de PhD, ensenya en la universidad de Binghamton, estado de New York.

La mas grande i emportante aktividad ke organiza ucLADINO es el simpozio anual de djudeo-espanyol, jeneralmente en Marso. Para el simpozio kada anyo ucLADINO kombida a lo manko dos ekspertos para dar un deskorso prinsipal. La lista sigyente es de los konferansieros ke tomaron la palavra asta agora: Rachel Bortnick i Alicia Sisso Raz; Liliana Benveniste, Marcelo Benveniste i Solly Levy; Karen Sarhon i Eliezer Papo; Avner Perez i Marie-Christine Varol; Bryan Kirschen i Devin Naar.

Para mas informasion: http://www.ucladino.com/

Kursos en el sentro Skirball

En los ultimos anyos Bryan Kirschen dio kursos de ladino (lingua i lteratura) en el Sentro Kultural de Skirball. Agora el es profesor de la Universita de Binghamton ande oganyo el ofrese un kurso de djudeoespanyol. (Mira seksion de New York.)

SEATTLE, WASHINGTON
La klasa de Ladino (“Los Ladineros”) i el hazan Isaac Azose

Desde 2008 Isaac Azose, el Hazan emerito de Ezra Besarot, dirije una klasa de ladino un dia por semana kon un grupo de personas ke toman plazer de meldar, kantar, i kontar en ladino. Un miembro de la klasa invento el nombre Los Ladineros, i kedo ansina. Los Ladineros tambien partisipan en la selebrasion del Dia de Ladino, organizada por el programa de Estudios Sefaradis en la Universidad de Washington en Seattle.

Aparte de esto todo, Isaac Azose eskrivio livros de orasion (siddurim) asegun la tradision de Turkia i Rodes, ke kontienen tekstos en ladino, i traduksiones al inglez - los primeros i unikos de este djenero publikados en los Estados Unidos. (Verlos en el sitio de http://www.isaacazose.com/Siddur.html ) .

Sephardic Adventure Camp

En los anyos de 1950s, kon la inisiativa del haham Salomon Maimon, las komunidades sefaradis de Seattle, Sephardic Bikur Holim i Ezra Bessaroth fondaron este kampamiento de enverano para elevos de la 3era asta la 11ena klasa, situado en una ermoza rejion afuera de la sivdad de Olympia, Washington. Oganyo (2016) turo 17 dias, kon 87 ijikos i ijikas de 8 a 15 anyos de edad. Aparte de todo el pasatiempo ke tienen en la natura, las kriaturas azen las orasiones diarias i de shabat al uzo sefaradi, kon muncho en ladino, sienten kuentos de Djoha, azen “sketches” kon biervos i dichas en ladino, komen i se ambezan azer kozas de komer sefaradis, i mas. Esta eksperiensa kon la lingua i tradision sefaradi les da un sentimiento de ser sefaradi para toda sus vida.

Universidad de Washington en Seattle

La komunidad sefaradi de Seattle es konosida komo la mas aunada i aktiva en los Estados Unidos, ma gano ainda mas enerjia i fuersa kon la venida ayi de Devin Naar en 2011 komo profesor en la universidad de la sivdad ( University of Washington in Seattle, o UW.)

Devin arivo a la UW kon titolo ofisial de “Assistant Professor of Jewish Studies and History” - profesor asistante de estudios i istoria djudaika - kon el dover de ensenyar "Istoria Moderna de los Djudios de Evropa." En este kuadro el empeso a dar tambien kursos en estudios sefaradis, i en 2013 establesio el Programa de Estudios Sefaradis adientro del Stroum Center for Jewish Studies kon apoyo finansial de las famiyas Alhadeff, Almosnino, Benoliel, Franco, Galanti, i Lott (Cordova), ke formaron el “Sephardic Studies Founders Circle.”

Libreria Dijitada i Muzeo Sefaradi

Ty Alhadeff (ko-ordinador de investigasiones en Estudios Sefaradis) djuntos kon Devin i otros dijitaron mas de 1200 dokumentos (600 livros raros en ladino, jurnales, letras, kartpostales, fotografias, archivos de las sinagogas, dokumentos de imigrasion, manuskritos de piesas de teatro, i mas de 150 kantikas en ladino ke fueron enrejistradas en Seattle en los 1970s) i ansi establesieron la mas grande Libreria i Muzeo Sefaradi de Internet en el mundo ke se puede vijitar en: http://jewishstudies.washington.edu/sephardic-studies/
sephardic-studies-digital-library-museum/
.

Klasas

En el programa se ensenya no solo la istoria sefaradi de antes i de despues la Ekspulsion, sino ke el ladino tambien. Para el futuro, se espera tener klasas de ladino mezo Internet para elevos i el ancho publiko tambien.

Partisipasion de la komunidad

Munchos programes, komo konsertos de ladino, filmos, i konferensias (echas por personalidades muy konosidas komo Aron Rodrigue, Eliezer Papo, Karen Sarhon i mas) son aviertos para el publiko. El mas grande evenimiento en los ultimos tres anyos fue la selebrasion del Dia Internasional de Ladino, ande asistieron mas de 300 personas, de edad 9 a 95, i munchos de la komunidad partisiparon kon kantikas, istoria, estoryikas, proverbos, i mas, i siempre en konkluyendo kon komidas i dulserias sefaradis.

Difuzion ancha

El sitio de Web (http://jewishstudies.washington.edu/sephardic-studies/) tiene miles de vijitadores kada mez. En Twitter mas de 1300, i en Facebook mas de 2400 “amigos.” I entre eyos, munchos ke keren ambezarsen el ladino. Tambien, tuvo muncha publisita ke yego a miliones de personas mezo artikolos en jurnales de toda parte de la Amerika i el mundo en inglez, espanyol, ladino, fransez, turko, grego i yidish, i kon entrevistas en emisyones de radio, TV, Youtube i mas.

El shefe de todo esto, Dr. Devin Naar, fue ultimamente promosionado al posto de “Associate Professor” kon tenure (pozision permanente) en UW. Tambien se publiko su livro sovre Salonik Djudia, Jewish Salonica (http://www.sup.org/books/title/?id=25672)

MASSACHUSETTS

Kursos de Gloria Ascher en la universidad Tufts Munchos elevos universitarios, djovenes i algunos no tan djovenes, estudiaron i estan estudiando la lingua i kultura sefaradi mezo los kursos ke la profesora Gloria Ascher da en la universidad Tufts desdel anyo 2000, bazandose en una traduksion al inglez de los livros de estudio del ladino de Matilda Koen- Sarano. Agora tiene varios kursos, uno introduktorio (“Ladino Language and Culture”) ande asisten 15-20 estudiantes, ansi ke otros de “kontinuasion” para los ke keren adelantarsen, i tambien un kurso de “Sephardic Tradition” (Tradision Sefaradi), ke inkluye informasion sovre el ladino: lingua, kantigas i refranes.

La selebrasion del Dia Internasional de Ladino es una okazion emportante en la klasa de Ladino. Kada anyo tiene lugar durante la ultima lision en Desembre, para fiestar kon los muevos ladinoavlantes – los elevos.

Las lisiones de ladino van a kontinuar en Tufts, i la profesora Ascher tiene la klasa yena, este semestre, komo siempre, kon el maximum de 15 elevos permitidos, i otros asperando sus torno a entrar.

FLORIDA
Sephardi Federation of Palm Beach County

La Sephardi Federation of Palm Beach County (SFPBC) fue fondada en 1992 por Rosina Karako Smeraldi (de bendicha memoria) i su ijo Jack Karako en Boynton Beach, en el estado de Florida. Los primeros diez anyos tuvo munchas aktividades edukadivas debasho la direksion i inisiativa del infatigable profesor David Siman, z”l, el kual tambien fue prezidente del SFPBC en 1994-95

La aktual prezidente del SFPBC, desdel anyo 2008, (i tambien entre 1997 i 1999) es Rose Papo Allen.

Echar Lashon es un grupo informal ke se enkontra una ves al mez para el plazer de avlar, meldar, i diskutir en ladino.

Viva Ladino es una klasa ke se enkontra dos vezes al mez para estudiar la lengua djudeoespanyola, kon maestros voluntarios, no profesionales. La klasa es gratis, kon 10-15 estudiantes, lo mas de edad “de 60 para ariva,” i la maestra aktual es Dianne Mortensen.

Las Vijitas de Alhad son reuniones mensuales en dia de alhad, prinsipalmente para pasar la ora ma siempre kon algun program edukativo (filmos, konferensias, i mas), i delikatesas sefaradis para komer.

I siguro, siempre fiestan el Dia Internasional de Ladino. Para el treser DIdL, la klasa de “Viva Ladino” prezento una komedia teatral orijinala, titulada “Siete Modos de Gizar La Berendjena” (i bazada en esta kantika) kon la partisipasion de la audiensa ke kantava el refrano: “A mi tio, Djerasi, ke l’agrada bever vino, kon el vino, vino, vino, muncho i bien a el le vino.”

NEW YORK

Kursos akademikos de Daisy Sadaka Braverman

Daisy Sadaka Braverman, Izmirliya en New York, da kursos de djudeoespanyol en la Universidad de Pennsylvania en Philadelphia (Penn), una vez por semana 3 oras, i la otra vez por Internet una ora. Oganyo fue invitada por la universidad Yale (de New Haven, Connecticut) a dar estos kursos via Internet para los elevos de Yale i Penn endjuntos.

American Sephardi Federation

ASF se auno en 2002 kon Sephardic House (a vezes el nombre de la organizasion se ve komo ASF-SH) dos organizasiones ke fueron fondados por ijos de sefaradis del Imperio Otomano, i se topan agora en el edifisio de Center for Jewish History (CJH) en el sentro de la sivdad de New York. El ASF tiene aki una libreria rika de entereso sefaradi, i guadra los archivos del ASF i del SH

Robert Bedford- Viseprezidente de FASSAC

Aun ke no es un akademiko Robert (Bob) Bedford, de New York, es un importante investigador de la istoria sefaradi i eskrive, edita i publika livros de este tema. Tambien komo visprezidente del FASSAC (Foundation for the Advancement of Sephardic Studies and Culture) el establesio i dirija el sitio http://www.sephardicstudies.org/, en el kual se puede ver, entre muncho mas, los livros ke el tiene publikado i otros projektos ke izo, seksion de djudeoespanyol, i enlase a Ladinokomunita. (Bob fue uno de mis ayudantes al estableser LK.)

Alicia Sisso Raz (Voces de Haketia)

Voces de Haketia (http://www.vocesdehaquetia.com/ ) es un sitio de Internet dedikado a la promosion i konosimiento del Haketia ansi ke la istoria i kultura de los djudios marokanos. Fue kreado i es dirijido por A. Sisso Raz, nasida en Maroko, kresida en Israel, i agora rezidente de New York.

Universita de Binghamton, New York

El Dr Bryan Kirschen ke solo el anyo pasado resivio su PhD en los Angeles i tomo posto en la Universita del Estado de New York en Binghamton komo “Assistant Professor” de linguistika espanyola, mos aze saver ke este semestre el esta ensenyando una klasa de djudeoespanyol para “freshmen” (elevos del primer anyo de la universita.)

REJION DE WASHINGTON, D.C.

Las Vijitas de Alhad es un grupo de Djudios desendientes de famyias del antiguo Imperio Ottomano, kreado en 2000 por la famoza kantante Flory Jagoda, para mantener la lingua i kultura djudeoespanyola, kon enkontros un alhad al mez en una kaza. Flory, ke tiene oy mas de 90 anyos, no viene kada ves, ma siempre kontinuan la tradision ke kreo, kon komidas, kantigas i estudio de unos tekstos.

Judith Roumani (Sephardic Horizons)

Judith Roumani es la fondadora i redaktora de la revista dijital Sephardic Horizons (www.sephardichorizons.org). La Dra. Roumani establesyo esta revista en 2010 para inchir el vaziyo ke sintyo kon la desparision de La Lettre Sepharade, ke su version en inglez fue publikada (en papel) de 2000 asta 2007. Los artikolos orijinales, son en inglez i a vezes en fransez, i ay siempre una seksion en Ladino ande normalmente aparese un kuento de Rivka Abiri, un otro eskrito, i una poezia. Sephardic Horizons se publika tres o kuatro vezes al anyo.

FAIRFIELD, CONNECTICUT

Dr. Albert De Vidas - edita i publika desde 24 anyos la revista trimestral Erensia Sefardi, yena de informasiones de la istoria sefaradi (en inglez) i siempre kon una seksion en ladino sovre tradisiones, dichas, lingua, i/o kantikas. Oy en dia es la unika revista djudeoespanyola ke se publika en papel en los Estados Unidos.

DALLAS, TEXAS
Dia de Ladino i Semana de Kultura Sefaradi en SMU

Aunke en anyos pasados yo di klasas de Ladino en el Jewish Community Center, agora la mas importante aktividad en el kampo de djudeoespanyol ke tenemos en Dallas es la selebrasion del Dia Internasional de Ladino, ke no es mas solo un dia, si no ke una semana entera de programes sovre la lingua i kultura sefaradi en la universidad Southern Methodist University (SMU.) Al pareser es ke el Dia de Ladino i la Semana Sefaradi en SMU ya se fikso komo aktividades anuales, en la semana empesando el segundo alhad de enero (a lo menos todo tiempo ke la profesora Lander esta ayi.)

Ladinokomunita

Ladinokomunita, el foro de Internet para korespondensia solo en djudeoespanyol, nasyo en Dallas, ma en realidad es aktivo en todos los lados del mundo, ande biven sus mas de 1500 miembros ke meldan los mesajes kada dia, mezmo si no eskriven. Kon orgulyo podemos dezir ke Ladinokomunita, desde su fondasion en 1999 i dainda, es el uniko lugar ande el ladino se uza kada dia, en los boletines diarios, komo el ke amostramos aki:.. Los kurtos detalyos de ariva mos amostran ke kursos akademikos i grupos informales de ladino son muy pokos para un pais tan grande komo los Estados Unidos. Aun kon esto, siertas personas estan aziendo muy grandes kontribusiones al mantenimiento i konosimiento de la lingua kon sus proprios esforsos i talentos. Tenemos menester de munchos mas komo eyos.

Los kurtos detalyos de ariva mos amostran ke kursos akademikos i grupos informales de ladino son muy pokos para un pais tan grande komo los Estados Unidos.  Aun kon esto, siertas personas estan aziendo muy grandes kontribusiones al mantenimiento i konosimiento de la lingua kon sus proprios esforsos i talentos.  Tenemos menester de munchos mas komo eyos.

ARGENTINA

De entre todos los paizes latinoamerkanos, Argentina es siguramente el ke sovresale por sus aktividades en el kampo de la kultura sefaradi, en jeneral, i djudeoespanyola de manera mas partikular. La organizasion mas veterana es CIDICSEF (Centro de Investigacion y Difusion de la Cultura Sefaradi). ke tiene un riko programa de aktividades: kongresos internasionales i publikasion de la revista ”Sefardica”, ansi ke kursos i konferensias, atelies de folklor, siklos de sinema sovre temas djudios i sefaradis i tambien viajes i paseos a paizes atados a la istoria de muestras komunidades.

De entre los temas a los kualos fue tokado oganyo, en el kuadro de estas aktividades, kale mensionar en primer lugar el III Dia Internasional del Ladino, ke fue selebrado en Buenos Aires, el 14 de Avril; i tambien una muy interesante konferensia sovre la personalidad de Hasday Ibn Shaprut, ministro i konsejero del sultan de Cordoba Abdel Rahman III.

Al CIDICSEF se adjunto, estos ultimos anyos, un faktor mas ke, aun ke no sea grande por el numero de sus miembros aktivos, tiene a su aktivo alkanses muy impresionantes.

Liliana BenvenisteAvlamos de ”eSefarad”, kreado en 2008 por Marcelo i Liliana Benveniste i ke sovresale por su intensa aktividad periodistika, kulturala i artistika. En primer lugar viene sus buletin elektroniko, ”eSefarad”, ke traye kada semana la informasion mas aktualizada sovre lo ke akontese en el mundo en el kampo de la kultura sefaradi, al lado de rubrikas regolares de algunas de las figuras mas konosidas en el kampo de la kreasion literaria i folklorika en ladino, komo Matilda Koen-Sarano, Zelda Ovadia, Rachel Bortnick, Rivka Abiri i otros mas.”eSefarad” produse tambien un magazin elektroniko, transmetido kada semana en Radio Jay de Buenos Aires i Radio Sefarad de Madrid, i un programa de televizion en el kual son transmetidos videos de kongresos i enkontros, entrevistas i otros programas mas sovre la kultura sefaradi.

A esto kale adjustar el siklo de konferensias semanales “Raices de Sefarad” ansi ke el kurso “Savores de ladino” de Liliana Benveniste, ke sovresale tambien por su talento muzikal i da konsertos de kantes en ladino no solo en Argentina sino ke en munchos paizes mas. Liliana Benveniste kon los estudiantes del kurso Savores de Ladino.

La aktividad de ”eSefarad” se espande tambien al kampo del turizmo kultural, i se esta organizando para el 2017 un tur, ke yeva, el tambien, el nombre de “Raices de Sefarad”, i ke tomara a los partisipantes, giados por Marcelo i Liliana Benveniste, a los prinsipales lugares en Espanya i Portugal ke son atados a la istoria i a la kultura de las komunidades djudias ke bivieron ayi.

Refranes sovre los vizinos

*El ke tiene buen vizino tiene buen dotrino
*Mas vale vizino bueno ke ermano i primo
* El ke tiene tejado de vidro
no echa piedra al tejado del vizino

Tornar