LA PAJINA DJUDEO-ESPANYOLA
AKI YERUSHALAYIM
Revista Kulturala Djudeo-espanyola

PAJINA DE ENTRADA

AKI YERUSHALAYIM

ULTIMO NUMERO

TODOS LOS NUMEROS

AKI YERUSHALAYIM #99-100

LA JUDERIA DE BARCELONA
Zelda Ovadia

Muncho se tiene avlado de las djuderias en Espanya ma muy poko o kaji ke no se tiene eskrito sovre la djuderia de Barcelona. Es muy probable, ke kuando vijitamos en esta sivdad, pizamos en los mizmos lugares ande se topava esta djuderia onde, sienes de anyos atras, bivieron muestros antepasados.

Barcelona, la segunda mas grande sivdad de Espanya, despues de Madrid, es la kapitala de Catalonia, situada al Norte-Este del paiz i famoza, entre otros, por los luksuozos sentros de rekreasion i turismo en la Costa Brava, a la oriya del Mediterraneo.

Kon su antiguo kuartier gotiko, su famoza Rambla, sus restaurantes kosmopolitas, su arshitektura moderna, kon la Bazilika de la Sagrada Familia i el Park Güell, las kazas i ovras maestras multikolores del arshitekto espanyol Gaudi, ansi ke su klima tipiko mediterraneo, Barcelona es una de las mas ermozas sivdad de Espanya ke atraye a miles i milarias de turistas ke vienen de todas las partes del mundo.

La prezensia de djudios en Barcelona esta dokumentada ainda antes de la existensia del kuartier djudio en esta sivdad, aunke no es klaro si esta prezensia djudia konstituiya una komunidad. De investigasiones echas en esta rejion, se supoza ke uvo ayi aresentamientos djudios ainda en le epoka vizigota.

La primera djuderia de Barcelona fue kreada en el siglo IX. Un primer dokumento sovre la existensia de un kuartier djudio, de un call en Barcelona, data del siglo XI. Es muy posible ke la palavra katalana call viene de la palavra ebrea kahal uzada para dezinyar las djuderias i kuartieres djudios.

Al prinsipio, los djudios de Barcelona no tuvieron problemas. En la epoka de Ramon Berenguer I, verso la metad del siglo XI, se nota ke avia djudios proprietarios de tierras i kazas en la sivdad. Uno de eyos fue M. Reuben ke tenia su propriedad al lado del Monjuich, el simeterio djudio de la sivdad en el siglo X. El istoriador Yehuda ben Shlomo Alharizi eskrivio en el siglo XII: "En Barcelona (ay) una komunidad kompuesta de prinsipes i aristokrates", referandose mas a los djudios de la sivdad ke a la povlasion kristiana.

A lo largo de los anyos Barcelona devino un porto komersial de grande importansia i los djudios djugaron un rolo muy importante en el dezvelopamiento i prosperidad de esta sivdad, distingiendosen entre eyos fa-miyas kon nombres komo Jahuda de Cavalleria i Benveniste Ça Porta. Aun ke Barcelona nunka fue el prinsipal sentro djudio de Espanya, eya okupa un lugar importante en la istoria de los djudios de este paiz. En el anyo 1263, eya djugo un rolo muy importante en la istoria djudia en jeneral, i de Espanya mas partikularmente: Es en esta sivdad ke tuvo lugar la famoza Disputa ke fue enkavesada por el Rey Jaime I de Aragon, i en la kuala Rabi Moshe ben Nahman (Nahmanides) ke tenia un estrecho atadijo familial a Barcelona, fue yamado a defender el djudaismo i konfrontarse kontra Pablo Cristiani. A la fin del debate Nahmanides fue rekonosido komo el vensedor, ma las reaksiones negativas de las autoridades lo ovligaron a exilarse. Rabi Moshe ben Nahman ke era tambien el Gran Rabino de la rejion de Catalonia, duvo partir de Barcelona i el yego a Yerushalayim en el kolmo de la epoka de las Kruzadas.

De mizmo ke el resto de las komunidades espanyolas, los djudios de Barcelona tambien pasaron por diversas etapas de konvivensia kon el resto de la povlasion de esta sivdad. En el siglo XIV existian a lo menos sinko sinagogas en el kuartier djudio de Barcelona. El grande viajador Binyamin Mitudela, pasando por esta sivdad en el siglo XI, eskrivio en su diario ke avia ayi una santa komunidad de ombres savios i grandes en la Tora. Esta epoka de prosperidad i kalmo relativos se termino en el anyo 1391, en segito a la onda de atakos a las juderias de Espanya ke empeso en Sevilla, en el sud del paiz, i se espandio kaje a todas las otras rejiones. La komunidad djudia de Barcelona no salvo sino ke fue eksterminada kaje kompletamente, afuera de unas kuantas personas entre las kualas el gran rabino de la sivdad.

La juderia de Barcelona, ke se topava en el sentro de la sivdad, al lado de las Ramblas de muestros dias, desparesio. Munchas de sus kazas fueron okupadas por famiyas de la povlasion kristiana, i en algunos de sus espasios fueron fraguados muevos edifisios, entre otras lo ke es oy el Palasio de la Generalitat.

Uno de los mas atraktivos lugares de la sivdad es el Montjuic, en el kual se entrelasan arte, kultura, spor i istoria. Algunos istoriadores supozan ke la orijin del nombre viene de Mons Jovis, (Monte de Jupiter), bazandosen sovre el nombre ke fue dado al Templo fraguado ayi por los Romanos, para sus dio Jupiter, mientres ke otros istoriadores pensan ke su nombre es devido al simeterio djudio de la sivdad, Mons Judaico o Monjuich. En muestros dias el nombre de este monte es atado mas a los djogos olimpikos del anyo 1992, en segito a lo kualo el lugar fue transformada en un sentro de atraksiones mundial.

Komo rezultado de ekskavakasiones arkeolojikas, en Barcelona, de mizmo ke en Gerona, fueron deskuviertos numerozos restos arkeolojikos djudios, komo por exemplo piedras tombalas, ke fueron uzadas komo material de konstruksion i ke oy se topan en el Palau del Lloctinent, el Museu Mares, el Museu Militar de Montjuic i tambien al lado de la iglezia romana del Poble Espanyol.

Muncho mas importante, i de grande valor simbolika, son los restos de la Sinagoga Mayor, en el numero 7 de la aktual kaye San Domenec del Call. Esta sinagoga, la mas antigua de Espanya, fue deskuvierta grasias al lavoro de investigasion del istoriador medie-valista Jaume Riera y Sanz ke, en 1995 se djunto a los miembros de la Associacion Call Barcelona en la inisiativa de merkar el lugar, ke estava en el punto de ser transformado en otrun bar. De esta manera se pudo rekuperar una parte de la memoria istorika del djudaizmo de Catalonia i salvar del olvido esta sinagoga ke es importante tanto para el patrimonio djudio komo el katalan.

Despues ve aver alimpiado i restaurado los restos de esta muy antigua sinagoga, ke las ventanas de su fachada estan orientadas verso el Sudeste mirando a Yerushalayim, tuvo lugar ayi, el 22 de Enero 2006, una muy esmoviente seremonia de "Ahnasat Sefer Tora" (introduksion de Rolo de la Ley), i eya fue avierta de muevo al kulto relijiozo kon el nombre de Sinagoga Shlomo Ben Aderet. Oy tienen lugar ayi seremonias de Bar Mitsva i Bat Mitsva, bodas i azkarot.

La mayoria de los rikos manuskritos illuminados de los djudios medievales kreados en Catalonia pueden ser vistos, en la aktualidad en diversas partes del mundo: la famoza Hagada de Barcelona en el Museo Britaniko; la Biblia de Cervera, en la Biblioteka Nasional de Portugal; la Guia de Perpleksos de Maimonides, en la Biblioteka Real de Copenhague i el Atlas Catalan de Avraam Crescas, en la Biblioteka Nasional de Fransia… i la lista es larga.

Barcelona, una de las mas ermozas sivdades de Espanya, a la oriya de la Mar Mediterranea, kon su riko pasado djudio, ma tambien kon su prezente moderno, ke atraye a sienes de miles de turistas al anyo, desha en muestra memoria rekuerdos maraviyozos i tambien la savor en la boka para otruna vijita en su Rambla.

Tornar