LA PAJINA DJUDEO-ESPANYOLA
AKI YERUSHALAYIM
Revista Kulturala Djudeo-espanyola

PAJINA DE ENTRADA

AKI YERUSHALAYIM

ULTIMO NUMERO

TODOS LOS NUMEROS

AKI YERUSHALAYIM #99-100

LA SINAGOGA ESPANYOLA DE VENEZIA
la mas ermoza de las sinko sinagogas del “Gheto”

Jesús Gonzalez Fernandez

El gheto de Venezia Los sefaradis ke toparon refujio en la Serenisima Republika de Venezia izieron fraguar, en la segunda metad del siglo XVI, la Sinagoga Espanyola. Se trata, sin duda, de la mas ermoza de las sinko sinagogas ke tiene la sivdad, en el kuartier del Gheto.

No por azardo es la mas ermoza, siendo ke entonses la komunidad sefaradi aresentada en Venezia era muy prospera. El nombre de “il Geto”, onde se topava esta Sinagoga Espanyola viene de “geto”, ke en el dialekto de Venezia sinyifika “fundi-sion”. Era el lugar ke se rezervo para la povlasion djudia adientro de Venezia. Despues el termino se apliko, a vezes kon sierto tono pejorativo, El gheto de Venezia a los kuartieres onde se apartava a los djudios, separandolos del resto de la sivdad i, finalmente, se uzo para todos los kuartieres onde devia bivir la povlasion estranjera, adientro de una sivdad.

En konkreto, la Sinagoga Espanyola komparte espasio, adientro del Campiello delle Scuole (el Kampo de las Sinagogas) djuntos kon la Tedesca (komo su nombre indika, la almana), la Canton, la Levantina i la Italiana.

El arkitekto Baldassare Longhena, autor tambien de la Sinagoga Levantina, fue el ke realizo el proyekto de la Sinagoga Espanyola, ke su konstruksion duro un siglo. En la fachada blanka, sovresale un gran porton de madera, kon kuatro ventanas altas i ermozas.

En kuanto a la arshitektura interior, al prinsipio predominaron las formas moriskas, karakteristikas de la tradision sefaradi i ke expresavan sus nostaljia por Sefarad, mientres ke las reformas posteriores dieron a la Sinagoga su aktual aspekto barroko.

En la Sinagoga Espanyola sovresale la tipika dispozision veneziana del almario sagrado o aron akodesh i de la teva. Tiene, komo es lojiko en toda sinagoga, la “azara” para separar el espasio rezervado a las mujeres, ansi ke una balustrada semisirkular de madera, para definir la Arka de la Alianza. En el siglo XIX, se doto a la sinagoga de un organo.

Tambien kale notar la laja kon una inskripsion ke akodra la bomba ke en 1848, durante el asedio austriako, kayo sovre la sinagoga sin kavzar danyos i ke dize nasi: “passò con violenza, ma con giudizio” (paso kon violensia, ma kon akavidamiento”).

La Sinagoga Espanyola, fidel a su nombre, fue al prinsipio el lugar de enkontro de la komunidad sefaradi, aun ke kon el tiempo, i a kavza del menguamiento de la povlasion djudia de Venezia, agora van ayi a azer sus orasiones, sefaradis ansi ke eshkenazis, sin diferensia.

Tornar