LA PAJINA DJUDEO-ESPANYOLA
AKI YERUSHALAYIM
Revista Kulturala Djudeo-espanyola

PAJINA DE ENTRADA

AKI YERUSHALAYIM

ULTIMO NUMERO

TODOS LOS NUMEROS

AKI YERUSHALAYIM #99-100

DR. MARKO ALBUKREK - OVADYA MEDIKO DJUDIO,
ESKRIVANO I OMBRE DE LETRAS

El Dr. M. O. Albukrek nasio el 9 de Disiembre 1891, en Ankara. Su granpapa maternel era gran rabino i su padre era komersante i prezidente de la komunidad djudia de Ankara ke kontava, entonses, 300 famiyas.

Despues de aver terminado la eskola primaria, el estudio en el liseo turko de la sivdad, despues de lo kualo yego, djuntos kon su famiya, a Yerushalayim, estudio en la eskola de l'Alliance Israelite Universelle i termino en 3 anyos estudios ke devian turar 4.

Siendo un elevo dotado de espirito, ke todo el tiempo estava en bushkeda de kozas muevas, estava atirado por todo lo ke es verdadero, ermozo i bueno. Ansi es ke aprovechando el tiempo libre ke tenia en oras de tadre, empeso a estudiar en la Eskola de Beyos Artes, Betsalel, amasando chikas masas de barro i provando su talento en la skultura.

De la edad de 13 anyos tuvo un grande amor por la muzika i desde entonses el violon fue su mijor amigo. En su mansevez, el pinto i desino karikaturas ke arekojo en una chika koleksion.

En segito a un konkurso al kual partisipo, el fue akseptado a estudiar en l'Ecole Normale Israelite Orientale, de Auteuil, en Paris. Al terminar sus estudios fue nominado a una eskola en Alepo, al prinsipio komo profesor i despues komo direktor de esta institusion.

En 1914 fue mobilizado i enkaveso uno de los servisios de la Compagnie des Chemins de Fer (Kompaniya de trenos) en Bagdad, Irak.

Al terminar la gerra el torno a Paris, se enskrivio a la Fakultad de Medisina de la kuala fue diplomado el 9 de Djulio 1924, torno a Turkia i fue nominado al posto de mediko konsultante en el Ospital Or 'HaHayim, en Balat.

El fue mobilizado a la armada, i durante dos anyos sirvio komo mediko en Anatolia. A su retorno a Estambol, el torno a su posto en el Ospital Or 'HaHayim i al mizmo tiempo empeso a lavorar en el Ospital Fransez, Pasteur, en la sivdad. Entre los anyos 1941-1943 el kumplio su servisio militar komo ofisier de rezerva ma despues de anyo i medio el torno a Estambol i kontinuo a kumplir sus misiones en los ospitales Pasteur i Or 'HaHayim.

Miembro de la Asosiasion Turka de Medisina desde 1925, el publiko a lo largo de su kariera diversos artikolos en la prensa turka i estranjera i dio un grande numero de konferensias ke trataron de sujetos medikales i sosiales.

Aki unas kuantas de sus investigasiones sientifikas ke aparesieron en la prensa lokal i ajena:

1) La Blennorrhagie i sus danjeres, artikolo ke aparesio en el Almanak del Ospital Or 'HaHayim.

2) La ijiena publika en Turkia, Carnet Medical Francais – Paris

3) El rolo del mediko en la Sosiedad, lo ke el es o devria ser, konferensia ke fue publikada en el diario "La Republique"

4) Los diez komandamientos del hazino perfekto, informasion medikala ke aparesio en los jurnales Istanbul i el Journal d'Orient.

---------------------------------------------

Es interesante ke aun ke todos tenemos menester de los medikos en muestras oras de apreto, kuando estamos hazinos, la figura del mediko en  el refranero sefaradi es mas negativa ke pozitiva, sigun puede ser visto de la kurta seleksion ke traemos, de entre los refranes ke konosemos sovre medikos.
Ay refranes, por exemplo, segun los kuales muestas hazinuras pueden ser kuradas mizmo sin ayudo del mediko, komo:
*Kada uno  es mijor mediko para si
*Ken es mediko?   el ke paso los males
*El mijor mediko:   la natura, el tiempo, la pasensia
I ay tambien refranes muncho mas negativos, ke akuzan aviertamente  a los medikos de no saver komo kurarmos, sino ke, a la kontra, de ser responsables por la muerte del hazino, komo los ke dizen:
*Mediko matasanos
*Los yerros del mediko  la tierra los kuvija.

 

Tornar