LA PAJINA DJUDEO-ESPANYOLA
AKI YERUSHALAYIM
Revista Kulturala Djudeo-espanyola

PAJINA DE ENTRADA

AKI YERUSHALAYIM

ULTIMO NUMERO

TODOS LOS NUMEROS

AKI YERUSHALAYIM #99-100

LA IZLA DE RODES
Zelda Ovadia

El poeta i eskrivano fransez Alfonse de Lamartine, ke bivio en el siglo 19, avia dicho en su kamino a la Tierra Santa, en lo ke toka al lugar estratejiko de la izla de Rodes: "Kada paiz evropeo ke tiene en sus manos las yaves de Rodes es el ke domina al Mediterraneo, ansi ke a Ejipto i Siria tambien. En el mundo entero no konosko una pozision maritima mijor ke esta, un klima suave i una tierra mas fertil ke en Rodes."

Rodes es la mas grande i populara izla del Dodekanez (12 izlas en grego) en la Mar Egea. Segun una tradision, el nombre de la izla fue tomado de la palavra Roda, ke en el antiguo grego sinyifika Roza, flor ke segun la mitolojia grega, era uno de los simbolos de Helios el Dio del sol. En efekto la izla es yamada por muncha djente "Izla de las Rozas" tambien.

En la epoka ‘helenista Rodes fue okupada por diversos paizes i eya resivio su independensia solamente en el anyo 323 A.C., en segito a lo kualo eya se enfuertesio i devino un sentro komersial i kultural. La izla se distingio prinsipalmente en los kampos del arte i de la filozofia.

A la entrada del porto fue konstruida una estatua djiganteska konosida kon el nombre de Kolosos, konsiderada komo una de las siete maraviyas del antiguo mundo. La estatua era tan grande ke naves ke entravan al porto puedian pasar entre sus piernas. En el fuerte terremblo ke tuvo lugar en la izla, en 225 A.C., la sivdad fue destruida i kon eya la estatua tambien.

Un primer testimonio sovre una prezensia djudia en la izla data del anyo 142 A.C. Segun un otro testimonio, la prezensia de una komunidad djudia en la izla es konfirmada por las remarkas i insultos del istoriador i filozofo grego Hecateus Abdera, en lo ke konserna los djudios en el II siglo de muestra era,: ”Eyos son ateistos, no les gusta djente ajena i tienen superstisiones. Los djudios son bovos i un puevlo sin …”

Otra informasion, mas serioza, sovre los djudios de Rodes, se topa en el diario del famozo viajador djudio Binyamin Mitudela, del anyo 1150. En su vijita en esta izla el noto ke avia ayi 400 djudios i a sus kavesera los rabinos Hananel i Eliyau.

A lo largo de los anyos un grande numero de viajadores i komersantes vijitaron en la izla. En 1472, uno de eyos avia mizmo alavado la ermozura de las mujeres djudias i el talento de fabrikasion de ropas de seda.

Durante largos anyos Rodes fue okupada por los Kavayeros de la Orden de San Juan ke estavan de antes en la sivdad de Akko, el ultimo bastion de los kruzados en la Tierra Santa, asta ke fueron vensidos por Saladin, ke aksepto djuntos kon esto de desharlos salir i aresentarsen en la izla de Rodes.

Estos kavayeros, ke kedaron en Rodes asta ke la izla fue konkistada por las fuersas del Imperio Otomano, krearon ayi una muy impozante sitadela, kon una muraya para la defensa de la sivdad, i al interior kazas i palasios al estilo de los reynados evropeos, sigun podemos verlo de la sigiente foto, del Palasio del Gran Maestro de la Orden.

A los prinsipios del siglo de XVI los djudios fueron persekutidos por el governador Pierre d'Aubusson. En el orden de ekspulsion ke fue kitado kontra eyos, fue fiksado ke devian vender sus kazas i bienes i salir de la izla adientro de 40 dias. Djuntos kon esto, les fue defendido de pasar a bivir en tierras del Imperio Otomano, de miedo ke eyos podrian espionar en favor del Sultan. La kondision para la anulasion del orden de ekspulsion era de konvertirsen al kristianismo. Algunos akspetaron esta kondision, otros partieron a Fransia i se aresentaron en la sivdad de Nice, i uvo tambien ke fueron torturados i matados.

Esta situasion yego a su fin kon la konkista de la izla, en 1523, por el Sultan Suleyman el Manyifiko. La konkista de Rodes por los turkos djugo un rolo muy importante en la vida de los djudios. Munchos de los ke se avian konvertido tornaron a la relijion djudia. En esta mizma epoka el Sultan Suleyman embio a Rodes, afin de repovlar la izla, un grande numero de djudios ke estavan biviendo en otros lugares del imperio, desde la ekspulsion de Espanya, en 1492,

En segito a la yegada de estos djudios empeso tambien el enfloresimiento de la komunida sefaradi de Rodes. El kuartier djudio fue yamado La djuderia i la kaye prinsipal La Kaye Ancha. En desparte de la kaye prinsipal avia otras kayes mas kon nombres muy sovresalientes, komo por exemplo La Kaye de los Rikos, o la Kaye de los Lokos ke kon el tiempo su nombre fue trokado al de la Kaye de los Savyos.

Los kales de la izla sirvieron tambien de sentros kulturales i uno de eyos, el Kal Shalom, es aktivo asta oy dia.

Esta komunidad se mantuvo kon kavod 400 anyos, basho el governo otomano, asta ke en 1912, durante la gerra del Balkan, Rodes fue okupada por la armada italiana.

Segun una ley antidjudia, proklamada en 1938 por el governo fashista de Italia, todos los djudios ke yegaron a la izla despues de 1919 devian salir de ayi. Una anyo despues, en 1940, unos 600 djudios salieron de Rodes kon una de las naves ke servian para el transporto illegal de los djudios a Palestina. Ma por sus mala suerte, en segito a un fuego ke desbrocho en la nave eyos duvieron retornar a la izla.

Esta situasion se kontinuo asta ke el Amiral Campione fue nominado al posto de governador de Rodes i ke el anulo las leyes kontra los djudios. Ma kurto tiempo despues, la izla fue okupada por los almanes. En el 19 de Djulio 1944, los almanes ordenaron a los djudios de arekojersen en el lugar yamado Chimenlik, de onde fueron yevados a sus fin trajika en los kampos de la muerte. Para onorar sus memoria, la plasa ke era de antes el sentro de la djuderia de Rodes, i ke sovresale por su monumento kon tres estatuas de hipokampos, fue yamada “Plasa de los Martires Djudios.”

Rodes oy apartiene a Gresia i es muy apresiada por turistas de todas las partes del mundo i de Israel tambien.

En Rodes tuvo lugar un evenimiento istoriko konsernando a Israel: Es ayi ke fue firmado, en 1949, el akordo de armistisio entre Israel, Ejipto, Jordania i Libano.

 

Tornar