LA PAJINA DJUDEO-ESPANYOLA
AKI YERUSHALAYIM
Revista Kulturala Djudeo-espanyola

PAJINA DE ENTRADA

AKI YERUSHALAYIM

ULTIMO NUMERO

TODOS LOS NUMEROS

AKI YERUSHALAYIM #99-100

LA RUDA I SUS VERTUDES
Zelda Ovadia

La planta de ruda o kon su nombre sientifiko Ruta Graveolens, es orijinaria de Evropa, prinsipalmente de los paizes en la rejion de los Balkanes. Oy es kultivada en el mundo entero i es konosida komo “la yerva de los mil uzos”.

En Turkia, de mizmo ke en los paizes de los Balkanes, komo Gresia, Bulgaria, Yugoslavia i mas, ansi ke en kuartieres ande bivian sefaradis, komo en Yerushalayim, el “saksi” de ruda no mankava en sus kazas: en las ventanas, guertas i balkones…..

Entre sus munchas vertudes esta planta mengua i absorbe kon grande fasilidad las enerjias negativas ke pueden disturbar la armonia de un par, krea un atmosfera pozitiva a su deredor i un kampo kalmo al ken la poseda. Tiene la fuersa de aserkar a pares ke se separaron o a amigos ke, por una razon o otra se alesharon los unos de los otros.

Para poder gozar de todas estas vertudes la mijor solusion es tener esta planta en muestras kazas.

Dizen ke la planta mas poderoza es akeya ke se toma de un lugar ajeno, ma no ay duda ke si mozotros mizmos la plantamos, sus efektos pozitivos no menguaran. Lo importante es de bien kudyarla transmentiendole muestras propias enerjias. La ruda nunka deve ser plantada en un estado de depresion o un estado fiziko deskayido. Es akonsejado de karesar la planta suavamente i si kon el tiempo la ruda empesa a amurcharse este es un sinyal ke eya ya empeso a absorber la atmosfera negativa del ambiente. En este kavzo ay ke merkar una mueva planta, esperando ke esta tambien tendra las mizmas vertudes ke la anterior.

Entre las propriedades atribuidas a la ruda, eya es uzada tambien komo planta sedativa: el te (chay) de ruda es rekomendado para kombatir la insomnia i el stress i tambien en dietas para menguar de pezo. Para el te de ruda se uzan unikamente las ojas i no mas ke 12 para kada litro de agua. Buyir la agua kon las ojas, deshar repozar 10-12 minutos antes de kolar. La kantitad maksimala rekomendada es de dos tasas de te al dia. Dolores reumatikas i de artritis pueden ser alivianadas kon azete de ruda ke se prepara kon 50 gr. de ruda freska, machakada i media tasa de azete de oliva. Deshar repozar la meskla 2 o 3 semanas antes de uzarla.

En el folklor de los sefaradis de Turkia i de los paizes del Balkan la ruda okupa un lugar importante en todo lo ke toka el aynara, el ojo malo. En el pasado leshano, kuando los partos tenian lugar en kaza, se uzava meter un saksi de ruda a la entrada de la kamareta de la parida. En desparte de esto se apuntava sovre el kavesal de la parida ansi ke del rezin nasido, un ramiko de ruda djuntos kon una ahranda blu i una hamsika de oro. De esta manera estavan seguros ke ya alesharon el ojo malo i ke la madre i el bebe ya estan protejados de todo mal.

La ruda entro tambien al folklor muzikal djudeoespanyol kon el ermozo i konosido kante “Una matika de ruda” del kual vos traemos aki el teksto:

Una matika de ruda
Una matika de flor
Me la dio un manseviko
Ke de mi se namoro

Ija mia mi kerida
No te eches a perdision
Mas vale un mal marido
Ke servir un muevo amor

Mal marido es la mi madre
El golpe i la maldision
Muevo amor es la mi madre
La mansana i el limon.

-----------------------------------

Notas del kante “Una matika de ruda”
tal ke fueron notadas por Yitshak Levy
en su livro “Chants Judeo-espagnols

Tornar