LA PAJINA DJUDEO-ESPANYOLA
AKI YERUSHALAYIM
Revista Kulturala Djudeo-espanyola

PAJINA DE ENTRADA

AKI YERUSHALAYIM

ULTIMO NUMERO

TODOS LOS NUMEROS

AKI YERUSHALAYIM #99-100

EL KANTONIKO DE HAKETIA
Gladys Pimienta

Los Pilos, una famiya de alhaluineros

Los miembros de la famiya Pilo, orijinarios de Tetuan, fueron fabrikantes de konfites durante varias jenerasiones i en munchos lugares onde se establesieron.

En un livro de "mohel" de Tetuan, vemos ke la famiya Pilo "aze dulses".

En los archivos fransezes de Aljeria, enkontramos un Mimon Pilo, "bonbonnier" (fabrikante de bombones) en Oran, lugar al kual munchos djudios del Norte de Maroko se tresladaron en los anyos 1860, komo konsekuensia de la Gerra de Afrika.

En el livro de Angel Pulido, "Españoles sin Patria", podemos meldar ke en Sevilla se establesieron algunas famiyas del Norte de Maroko, i entre eyas miembros de la famiya Pilo ke se dedikavan, eyos tambien, a la fabrikasion de konfites i turrones.

En el "Livro de Actas de la Comunidad Hebrea de Tanger" figura un Yosef Pilo en una lista de fabrikantes de alhalua (turron). Siempre en Tanger, la konfiteria Pilo, ke funksiono asta los anyos 1950, era la pasteleria kasher mas importante de la sivdad. Era un salon de te onde se reunia muncha djente, i partikularmente los djudios, para merendar i tomar dulses.

La konfiteria Pilo estava espesializada en la konfeksion de los dulses i pasteles tradisionales djudios, la mayoria echos a baza de almendras o pasta real: los almendrados, los maronchinos, los masapanes, las lenguas, los bezos de almendra i los bezos de pasta, las moyetas, los mantekados, los merenges, etc. i sovre todo el turron de almendra.

Kuando se organizavan fiestas en la komunidad, era siempre la konfiteria Pilo la ke abastesia los dulses.

En todas las fiestas de famiya, bodas, sirkunsiziones, "tefelimes", se uzava entregar un paketiko kon konfites a kada invitado, antes ke este se despartiera para tornar a su kaza. Este paketiko, ke se yamava "punyo", estava echo de papel de seda blanko i tenia una forma muy espesial. Adientro se metia un exemplar de algunos de los dulses tradisionales sitados arriva (bezo, masapan…), akompanyados a vezes por bonbones, i estos dulses ke se metian en los “punyos” kaje siempre venian de la konfiteria Pilo.

Otra espesialidad de la konfiteria Pilo era la fabrikasion de una espesie de turron ke yamavan alhalua i ke se konsomava mucho, espesialmente durante la fiesta de Purim.

La fabrikasion de la alhalua era muy difisil i bastante peligroza. La asukar kayente kon la kuala se konfeksionava el turron saltava, provokando frekuentemente graves kemaduras. La famiya Pilo avia dezvelopado una pomada ke permetia de kurar efikasmente estas kemaduras. Eyos konservavan kon selo la recheta de esta pomada i la transmitian de jenerasion a jenerasion.

Kuando alguno tenia kemaduras en Tanger, ivan a la konfiteria Pilo para demandar un poko de esta milagroza pomada, "¡una pomada santa!" dezia la djente. La famiya Pilo siempre dava kon jenerozidad la pomada a todos los ke tenian menester de eya, ma nunka transmitia el sekreto de la recheta.

Se konta ke un dia, la ija del rey de Espanya, Alfonso XIII, tuvo un aksidente i tuvo graves kemaduras. Al saver esto, los Pilos de Sevilla enbiaron sus pomada a los reyes de Espanya, i grasias a esto la prinsesa se kuro. Keriendo manifestarles su agradesimiento, el rey les pregunto ke dezeavan tener. La famiya Pilo le respondio ke personalmente no dezeavan nada, ma ke se alegrarian si pudieran obtener un terreno para enterrar a los miembros de la komunidad djudia. El rey aksepto i les dio un terreno, onde la komunidad djudia de Sevilla fraguo su simeterio.

Despues de la Inkizision i de la Expulsion de los Djudios, este fue el primer simeterio djudio ke se fraguo en Espanya, mucho antes de los ke se konstruyeran en Madrid i en otras sivdades de Espanya.

------------------------------------------

La konfiteria es uno de los ramos mas rikos i interesantes de la gastronomia de los djudios del eks Maroko espanyol i inkluye, en desparte de los nombres ke mensionimos mas ariva, un gran numero de dulserias, de entre las kualas traemos aki la fotografia de una solo – “hojuelas”, ke es muy popular en las komumidades sefaradis de Afrika del Norte

Tornar