LA PAJINA DJUDEO-ESPANYOLA
AKI YERUSHALAYIM
Revista Kulturala Djudeo-espanyola

PAJINA DE ENTRADA

AKI YERUSHALAYIM

ULTIMO NUMERO

TODOS LOS NUMEROS

AKI YERUSHALAYIM #99-100

KUENTOS I SHAKAS

EL PUNTIKO DE LA YOD
del livro  “Kuentos de la famiya djudeoespanyola”de Matilda Koen-Sarano

And'avia de ser un rey, ke tinia tres konsejeros: un haham, un hodja i un papas. Estos dos le metieron en la kavesa del rey ke el haham kalia ke se konvertiera al kristianizmo.  El rey se konvensio, i empeso a azer presiones sovre el  haham, para ke se konverta. Tanto le disho el rey, ke el haham, kuando vido ke no ay hayre ke el rey troke su idea, le disho:

  • Esta bien, sinyor rey. Ya me va konvertir, ma una kondision: ke vengas para Shabat ke viene a muestro kal, a sintir la Tefila".
  •   Bueno!" , le respondio el rey, i ansina fue. Se vistio el rey en sivil i vino al kal la demanyana de Shabat.

Tendresh ke saver ke las parashiyot de akel Shabat eran “Tazria"  i "Metsora", ke a las vezes se meldan adjuntadas. Estas parashiyot son muy komplikadas i difisiles a meldar, porke son yenas de palavras ke tienen munchas "e",  ke se pueden meldar "i",  i munchas "i", ke se pueden  meldar "e".
Tomo el haham el puntero de la mano del shamash, i meldo kada "e" - "i", kada "i" - "e".  I a kada yerro ke el azia, el kal entero se metia a korijarlo a gritos.. Si dizia "e", todos gritavan "i....!",  i si dizia "i",  todos le gritavan:  "e....!"
Vido esto el rey i se maraviyo muncho. En akel punto no disho nada, ma el dia de despues lo yamo  al haham i, ulvidandose de la razon por la kuala se avia ido al Kal, le demando:

Kualo es esto? Ke manera de djente sosh vozotros djudios? Porke no

  • eskuchash al ke aze la orasion?" .

Le respondio el hahan:

  • Sinyor rey, komo podemos mozotros djudios konvertirmos al kristianizmo? Si  diskutimos por el puntiko de la yod; si no deshamos repozo al ke esta meldando la Tora, i no mos kedamos kayados kuando se yerra, komo podemos akseptar todas akeyas kreyensas, ke vozotros kristianos akseptash sin diskusiones?"

Se konvensio al rey de las palavras del haham i no lo forso mas a konvertirse.

Kontado por Yaakov Elazar, 1983

 

KUENTO DE DJOHA
de: Djoha, Djohaya
Nouveaux Contes Judeoespagnols
Angele Perla Saül
Ed.  Biblieurope

Djoha bivia kon su ijiko de sinko anyos i pasava su tiempo a dar chikos servisios, komo traer el chay al fierrero, alimpiar los kavayos i los gameos delantre del kervansaray i a vezes akompanyar funerayes de kristianos, yorando djuntos kon la famiya asta el simeterio, lo ke era defendido a los djudios, ma el azia todo esto para ganar unos kuantos  groshes.
En las fiestas djudias el resivia donos de la komunita i merkava vistidos muevos a su jo. "Zavalli", desmazalado, pensavan sus vizinos kuando lo vian djugar kon su ijiko "la gaynika del koko":
"Aki mete el gueviziko de la gaynika. Este dize dame pan. Este dize no ay. Este dize vamos a arovar. Este dize no! ke mos mata el rubi! Este dize por aki, por aki, por aki…."
A este momento Djoha azia kushkias a su jo i la rizas rompian la tristeza.
El retorno a la  realidad siempre era difisil. Merkar la kandela para la noche, dar a komer al chiko… Una verdadera dolor de kavesa!!!!!
Un dia Djoha tuvo un sentimiento ke un miraklo devia tener lugar en serka.
El yevo a su kerido Nisimiko a la kampanya, lo desho ayi i torno kon un gato preto ke tenia ojos blus. El keria forsar, trokar su destino a ke se interese de su suerte, pensando a una idea, en la esperansa ke podria trokar su vida.
Akeya noche, kuando estava asando una berendjena sovre la lumbre, alerto al vizindado gritando:

  • Ayudo! Ayudo! Mi ijo se transformo en gato!!"  

Alokados todos vinieron i vieron, en efekto, el rezultado kon sus propios ojos. Kada uno empeso a ver los ojos blus de Nisimiko en el gato.
Akonsejaron a Djoha de enkontrarse kon los astrologos del Sultan, de meter el gato delantre del Aron 'HaKodesh  en el kal, i en dia de Shabat azer una orasion afin ke Nisimiko retorne a su aparensia. Ma Djoha se kontento de meter, al deredor de la garganta del gato, piedras de kamforo i un ojo blu kontra el ojo malo,  karesarlo i eksplikarle la situasion.
Malgrado las orasiones i las rogativas de los fideles la situasion no troko. El gato kontinuava a "lavarse" kon su alguenga, mirando a toda la djente ke pasavan delantre de el. Entonses Djoha tuvo una idea: de azerse pagar por las vijitas. Metio a Nisimiko el gato alientro de un sesto a la entrada de su kaza i empeso a kontar los ultimos momentos ke el paso kon su ijo, delantre de la lumbre asando las berendjenas.
La djente esmovidos, yoravan i las monedas saliendo de las aldikeras inchian el kuti de teneke. Ma una noche, profitando de una eklipsa de luna, el gato se fuyo.

  • Barminan! A Dio Santo!! grito Djoha, “mi proyekto se derroko!! Amanyana devia vinir el mediko para ver el mizmo el fenomeno del kual le avlaron.

A la noche Djoha trusho a su ijo atras, lo metio en el sesto i lo kuvrio kon una savana blanka. El mediko ke vino al dia de despues entendio ke esto no era mas ke una mintira bien planeada.  Djoha estava en el punto de demandar pardon i eksplikar kuala fue la razon de esta mintira, kuando Nisimiko empeso a mauyar komo un gato i salto afuera del sesto, koriendo de un lugar al otro.
El mediko yego entonses a la konluzion ke este komporto de la kreatura era devido a un espanto ke tuvo en su chikez i rekomendo a Djoha de konsultarse kon una endulkadera, ke organize una seremonia kon todos los fideles.  I komo por miraklo la kreatura empeso a avlar diziendo, entre otras:

  • Ke felisidad de poder menearme, sinti tanta estrechura en el puerpo del gato!"

Ansi es ke el ijo salvo al padre del embrolio en el kual se avia metido, bushkando un remedio a sus mizeria. Agora Djoha ya tenia bastante moneda para dar una mijor vida a su trezoro de ojos blus.

 
AMOR DE MARIDO

Djako ke estava estudiando en una universidad serka de la kaza de su tio i tia, ke avia tiempos ke no los avia visto, desidio de ir a vijitarlos.
El tio, de 75 anyos de edad, adresandose a su mujer le dize: "Mi flor, me puedes traer una tasa de chay? Ke sea sin asukar."
La mujer, de 65 anyos de edad, le trae el chay kaente i lo poza sovre la meza. "Kerida mia, tomates la pena, grasias.."  i la mujer  le responde kon un sonriza: " Beraha i salud pasha!!!"
El sovrino keda muy impresionado de estas palavrikas de kerensia i amor, i le demanda al tio:
-Kuantos anyos ay ke estash kazados???
-Ya pasaron los 40 - le responde el tio.
-Guadrados de nazar i ke bivash munchos anyos mas, en paz i amor i alegria en el korason. Tio, de tanto ke la yamas “mi flor, mi amor”, las karas de la tia ya se chapetearon, se izieron koloradas."
La tia, muy kontente, le dize a Djako: -Ya es verdad, ya son munchos anyos ke me yama de esta manera -  se abolta i se va a la otra kamareta.
Entonses el tio se aserka de la oreja deDjako i le konfesa:
-No tea agas del savido, ma ya son dos anyos ke me olvidi su nombre i no me le esto akodrando mas!!!!

 

NO SE

Ansi mos konta una anekdota sovre uno de los verbos irregulares en muestra lingua -  el verbo "saver" 

Tres ninyos estavan asentados en la estasion sentral de Tel Aviv.
Los yamaremos: Avraham, Yitzhak, i Yaakov.

Avraham demando:
- "Ande es la estasion para Holon"?
Yitzhak respondio:
- "no savo!"
Yaakov disho:
- "No se dize NO SAVO. Se dize NO SAPO"
Un ombre ke estava asentado al lado de eyos, disho:
- "No se dize NO SAVO, i tambien no se dize NO SAPO!"
 - "Entonses, komo se dize?" demandaron los ninios.
El ombre respondio: "NO SE".
 Yaakov se eniervo i grito: "I si tu no saves, ke te estas entremetiendo?!!!"

Yehuda Hatsvi
(tomado del foro de internet LadinoKomunita)

 

 

Tornar