LA PAJINA DJUDEO-ESPANYOLA
AKI YERUSHALAYIM
Revista Kulturala Djudeo-espanyola

PAJINA DE ENTRADA

AKI YERUSHALAYIM

ULTIMO NUMERO

TODOS LOS NUMEROS

AKI YERUSHALAYIM #97-98

LIVROS, REVISTAS, ESTUDIOS I ARTIKOLOS

 

VOCES DE SEFARAD
Romina Basso  -  Alberto Mesirca
www.brilliantclassics.com

Fruto de un enkontro entre Romina Basso i Alberto Mesirca en un konserto ke dieron en Finlandia, este disko mos traye una seleksion de kantes de la tradision popular espanyola, djuntos kon tres kantes en ladino, de los ke Mesirca pudo arekojer durante su lavoro en el Archivo Muzikal de la Biblioteka Nasionala Bayazid, en Estambol, onde yegaron munchos de los djudios ekspulsados de Espanya.
El disko inkluye tambien algunos “taksimes” (improvizasiones) de muzika turka por los ekselentes muzisienes ke akompan-yaron los kantes, dando ansi una idea de la atmosfera en la kuala se kreo i se dezvelopo la muzika sefaradi en el  Imperio Otomano.

 

EL ALMA LASTIMADA 
Y OTROS POEMAS  - Ibn Gabirol
Curro Piñana
curropinana@gmail.com

Este muy interesante disko es parte del proyekto del kantador andaluz Curro Piñana, de adoptar para su aktividad muzikala kantes de las tres grandes “Relijiones del Livro” – la kristiana, la muzulmana i la djudia.
El proyekto ke inkluyo al prinsipio poemas del poeta mistiko arabo Ibn Arabi, i despues del poeta espanyol San Juan de la Cruz (Juan de Yepes), es kompletado agora kon este disko ke mos prezenta 10 poemas del famozo poeta djudio de Espanya, Shelomo Ibn Gabirol, i 3 poemas mas ke son interpretados kon
muzika orijinala del kantador.
El disko inkluye tambien 2 kantes mas, sovre tekstos orijinales de Piñana – uno sovre la ekspulsion de los djudios de Espanya i el sigundo sovre la fiesta de Hanuka.

 

ESENCIAS DE SEFARAD
   El komer i el kantar   es al empesar
Paco Diez    Raul Olivar
Aula Museo Paco Diez

Kantados por Paco Diez, akompanyado a la  gitara por Raul  Olivar, tenemos en este disko 13 kantes ke son atados, de una manera o otra, a los diversos aspektos de las komidas sefaradis ansi ke de las fiestas, seremonias i alegrias atadas a este tema, komo: La Sena del despozado,  Peshkado frito, Los modos de gizar berendjenas, La vida do por el raki i muchos mas

 

 

DE LA GRESIA KON AMOR
Giannis Karalis, Rahel Matsa,
 Dionisos Teodorou, Itsik Tsarom,
 Betty Klein, Ye’hudit Nemetu

Disko del konserto ke fue dado el 31 de Mayo en Bet Shmuel,  en memoria del arkeologo i shefe de la komunidad grega en Yerushalayin, Vasili Tsipris.
El konserto inkluyo kantes en grego, en ladino i en ebreo, reflektando ansi el ambiente multikultural en el kual enfloresio la muzika sefaradi

Tornar