LA PAJINA DJUDEO-ESPANYOLA
AKI YERUSHALAYIM
Revista Kulturala Djudeo-espanyola

PAJINA DE ENTRADA

AKI YERUSHALAYIM

ULTIMO NUMERO

TODOS LOS NUMEROS

AKI YERUSHALAYIM #99-100

GASTRONOMIA SEFARADI Zelda Ovadia

Uno de los lugumbres mas konosidos en el gizado sefaradi es la kalavisika. En el pasado este lugumbre aparesia en los merkados en la primavera, serka de la fiesta de Pesah i me akodro ke para el menu de la fiesta  se merkava tambien zerzavat "turfanda" (de premisios), komo las avas freskas, la bezelya i  tambien las kalavasikas. En muestros dias, komo muncho otro zerzavat, las kalavasikas tambien se topan en los merkados kaji el anyo entero.
La orijin de este lugumbre no es konosida ma ay provas ke el ya era konsomado, en la antiguidad, por los ejipsianos, i en epokas mas tadre por los gregos i romanos. Ma fueron los arabos ke ekstendieron su kultivo a paizes de la rejion del Mediterraneo ande es konsumido kaji en todos los paizes de esta rejion.
En el gizado sefaradi es uzado de diversos modos: kalavasikas reyenadas, kuartikos de kalavasa, almodrote de kalavasa, en supas de zerzavat i mas i mizmo azen una komida muy savroza kon las kashkarikas de la kalavasa.
Las kalavasikas son rikas en potassium, fosforo, kalsium, magnezyo, fierro i sodium i siendo ke kontienen muy pokas kalorias, son rekomendadas a los ke azen dieta.
Vos traemos aki tres rechetas de las mas konosidas en el gizado sefaradi:

KALAVASIKAS REYENADAS                   
Ingredientes:

1 kg. de kalavasikas
1/2 kg. de karne pikada
1 kucharika de sal
1/2 kucharika de pimienta
1/4 de vazo de azete
1 kuchara de asukar

Preparasion:

Kortar la "kavesa" de las kalavasikas i lavarlas bien basho agua koriente. Kavakarlas kon kudyo, todo en metiendo tino de no burakarlas.
Mesklar la karne pikada kon la sal i pimienta   i reyenar las kalavasikas. En una kaldera yana kaentar la azete, adjustar la asukar i  kon una kuchara de tavla mesklar asta ke la asukar se karameliza. Adjustar las kalavasikas i "friyirlas" en la asukar todo en aboltandolas por todas las partes, asta ke toman la kolor del karamel. Kuvrirlas de agua i kozer a fuego mediano asta ke un piron penetra fasilmente en el lugumbre.

KUARTIKOS I KASHKARIKAS DE KALAVASA
Ingredientes:
5-6 kalavasas medianas
4-5 kucharas de supa de azete
1/2 limon el sumo (o a gusto)
1/2 kucharika de sal

Preparasion:
Para los kuartos: Lavar bien, basho agua koriente, kortar las kalavasas en kubos, adjustar la azete, sal i sumo de limon, kuvrirlas de agua i kozer a asta ke se ablandan. Este plato se puede komer kaente o yelado. Al ken le gusta puede adjustar tambien un kuarto de vazo de arroz  o uno o dos dientes de ajo.
Para las kashkarikas:
Lavar bien, mundar las kashkara en tiras  kon un "pelador" o un kuchiyo bien aguzado, meter las kashkarikas en una sarten, adjustarles agua, sal, pimienta i salsa de tomat… Kozerlas a fuego moderado… unos 20 minutos.

ALMODROTE DE KALAVASA
Ingredientes:
5-6 kalavasas grandes
1/4 de vazo de azete
2 guevos
150 gr. de kezo blanko
150 gr. de kashkaval  rayido
1 kucharika de sal
1/2 vazo de pan rayido o de arina

Preparasion:
Mundar las kalavasas, lavarlas, rayerlas i despues esprimirlas bien. Mesklar  las kalavasas kon el resto de los ingredientes. Eskudyar la meskla a un pyrex o todo otro resipiente ke va al orno. Dekorar el almodrote kon revanadas de kashkaval o todo otro kezo duro (gruyer, emmenthal o otro) i ornar a fuego moderado asta ke el almodrote toma una kolor dorada. Antes de kitar del orno ay ke gostar afin de verifikar si la meskla tambien ya esta a punto.

 

 

Tornar