LA PAJINA DJUDEO-ESPANYOLA
AKI YERUSHALAYIM
Revista Kulturala Djudeo-espanyola

PAJINA DE ENTRADA

AKI YERUSHALAYIM

ULTIMO NUMERO

TODOS LOS NUMEROS

AKI YERUSHALAYIM #101

LETRA DEL REDAKTOR
Moshe Shaul

Keridos amantes del ladino i su kultura,

Mas de 2 anyos pasaron desde la publikasion del ultimo numero de la revista Aki Yerushalayim, ke su absensia es deplorada por todos los lektores ke mos akompanyaron en los mas de 30 anyos de su publikasion.

En el mez de Avril de oganyo kumplieron los 40 anyos desde el primer numero de la revista i keremos markar esta data kon una version dijitala de Aki Yerushalayim, ke esperamos ke sera bien resivida, de manera ke podamos kontinuar en su publikasion.

Esperamos gozar de vuestro apoyo i kolaborasion, en embiadomos no solo vuestros konsejos i komentarios, sino ke tambien artikolos, poemas, kuentos i mas sovre temas de la kultura djudeoespanyola.

El ekipo editorial

Moshe Shaul

NINA PINTO ABECASSSIS d.b.m.

El 26 Djulio de oganyo pedrimos a la Dra Nina Pinto Abecassis , distingida investigadora del haketia i del folklor de los djudios del Norte de Afrika, en jeneral, i de los de Tetuan de manera mas espesiala.

Eya nasio en Ashkelon en 1971, en una famiya haketia-avlante orijinaria de Tetuan. Estudio en la Universidad Ebrea de Yerushalayim onde izo su doktorado, despues de lo kualo se djunto al ekipo de profesores i investigadores del Instituto Salti, en Ramat Gan, i de la Universidad a Distansia de Tel Aviv. Resivio el premio Refael Patai ansi ke el Premio BenZvi 2015 por su livro “El pavo, el planchado y la media”, sovre las alkunyas i apodos de los djudios de Tetuan.

Desdel anyo 2015 eya kumplio tambien las funksiones de konsejera de la Autoridad Nasionala del Ladino i su Kultura.

Tornar