LA PAJINA DJUDEO-ESPANYOLA
AKI YERUSHALAYIM
Revista Kulturala Djudeo-espanyola

PAJINA DE ENTRADA

AKI YERUSHALAYIM

ULTIMO NUMERO

TODOS LOS NUMEROS

AKI YERUSHALAYIM #101

EL SR. DAVID BEN GURION REGRETO KE NO AMBEZO EL LADINO
Sara Sufrin Baruch

En el anyo 1912 el Sr. David Ben-Gurion, el ke (mas tadre) ue uno de los fondadores del estado de Israel i su primer ministro, arrivo a Salonik-Gresia, ke estava entonses basho del dominio Otomano, para embezar la lingua turka, kon el buto a ser akseptado a la Universidad komo estudiante de Derecho. La razon ke prefero la sivdad de Saloniko fue por ke savia ke era una sivdad djudia.

En su letra, al Sr. Recanati, editor del livro "Ziheron Saloniki" * (Memoria de Saloniko) en el anyo 1970 , el Sr. BenGurion deskrivio sus rekuerdos i impresiones, sovre la sivdad, onde moro un poko mas de un anyo.

Kuando yego a Saloniko, se enkontro kon una sivdad djudia ke no era komo ninguna otra en el mundo entero, ni en Israel. Su dezeo era ke un dia si se va avrir gerra, Salonik va ser un estado independiente kon abitantes djudios.

Todos los lavoros en esta sivdad - en las fabrikas, en el komersio i en el porto, era echo por manos de ovreros djudios, los barkos no podian deskargar su kargo o salir a la mar en Shabat, porke los ovreros djudios no lavoravan.

En Saloniko Ben Gurion moro en la kaza de una famiya djudia ke su patrona, una mujer aedada, lo trato komo ser su fijo, ma eya no podia entender por ke el no save avlar ladino, la lingua avlada por los djudios de la sivdad. Djente ke konosia en la sivdad, lo akavidaron de no kontar ke es de orijin "Ashkenazi ", ke no era konsiderado positivo.

Desde ke ayego a la sivdad para ambezarse la lingua turka, enkontro un maestro djudio, un estudiante de la Universidad de Salonik, yamado Strumsa, ke savia un poko de Ebreo, i le ofrio su ayudo. Siendo ke la lingua turka no era fasil, desidio a dedikar todo su tiempo estudiarla i no aprovo a ambezarse el ladino

Durante su estada en Salonik el Sr. David Ben Gurion fue okupado tambien en aktividad Sionista, kreo kontakto kon los ovreros djudios de la sivdad, konvokoreunionas i dyo konferensias sovre el Sosializmo Djudio.

En la gerra de los Balkanes, ke se desbrocho en 1913, la sivdad fue konkuistada por los Gregos, el Sr. Ben Gurion fue ovligado a pasarse a Estambul, donde estudio Derecho en la Universidad, despues ke termino la segunda klasa en el anyo 1914, la Primera Gerra Mondial kavzo ke fue expulsado de la Turkia i torno a Eretz Israel.

El Sr. David Ben Gurion regreto siempre, ke durante su estada en Saloniko, no ambezo el Ladino, porke akel tiempo, la mayoridad de los abitantes djudios ke bivian en Yerushalayim, eran Sefaradim i avlavan Ladino.

Mas de todo lo ke le vino pena, era por la sivdad Salonik, ke era la sivdad mas djudía en el mundo entero, i fue konvertida en una sivdad grega i durante la Segunda Gerra Mundial, kaji todos su abitantes djudios, fueron eksterminados por los nazistas.

__________________
* Fuente: El livro "Ziheron Saloniki" (Memoria de Saloniko) "La grandeza i la destruksion de Yerushalayim de Balkan", Editor: David Recanati.

Tornar