LA PAJINA DJUDEO-ESPANYOLA
AKI YERUSHALAYIM
Revista Kulturala Djudeo-espanyola

PAJINA DE ENTRADA

AKI YERUSHALAYIM

ULTIMO NUMERO

TODOS LOS NUMEROS

AKI YERUSHALAYIM #101

Kol hatora kula
Michal Held Delaroza

Kol hatora kula

Ke es la fuersa del Judeo-espanyol?
Ke tyene ke no egziste en otras linguas?
I porke el avlar en esta lingua es una segula
de estar akompanyados por mallahin entre suenyos?

* * *

Esta es kol haTora kula:

Shalom beraha vetova
Los kaminos de leche i miel

Buena beraha
Meoyo bueno ke tengas

Nochada buena
Betov talini
Berahamim rabim takitz

Ke mos arrelumbre el anyo
Para kada anyo mijorado

Mued alegre

Haberes buenos

En Ganeden ke 'ste
Ke su alma repoze en Ganeden

Semanada buena i klara
Mijor de las pasadas
Aklarada buena

Salud i vida
Beraha i salud

Novia ke te veya

Bendicho el Dio
Adonai Dio Santo.

* * *

I esta es kol haTora kula al kontrario:

Perro ijo d'otro

Mazal basho
Mazal negro

Ida sin venida
Ke se vayga ande se kome guevo entero i sin sal

Rematado ke lo veya

El kapak ke le kayga

Apalpando las paredes ke kamine

El guerko ke se lo yeve
Al Diavlo ke se vaya

Amudision ke la kayga

La alma ke la salga

En el garón ke le kede

Kiná a ke le kayga
Mapala ke le kayga

Lenyo tuerto no s'enderecha
Ken negro nase djamay s'enderecha

Korason de Amalek

Pedaso de animal

La estrea ke te kaiga

Maldicha sea
El Dio ke la page.

* * *

I por todo esto seremos mozotros los mallahin
ke akompanyen
el Judeo-espanyol

I por todo esto no la vamos a abandonar
mizmo si ya no ay
kon ken
avlar.

Tornar